Nongpoh, Risaw 07
Ha kawei ka jingjia kaba kham pher bad lehse ka bym ju da kham jia koit, u lok jong kawei ka longkmie na Ri Bhoi kaba la khlad ha ka shnong Maroit, Eastern West Khasi Hills District u la phet jyndat noh ha ryngkat ki bahaïing ki jong u, khlem da ap satia wat tang ban pyndep ïa ka jinglehniam khatduh ïa ka met jong ka lok ka jong u.
Kane ka jingphet jyndat ka jong u lok, kala pynlyngngoh bad pynlong ïa ki bahaïing hasem katei ka longkmie ban tharai sniew ba ïoh lehse u don bynta ha katei ka jingkhlad ba kyndit jong katei ka longkmie kaba dei ka bahaïing ka jong ki, kat haduh ba kin hap ban pyntip sha ki bor pulit na ka bynta ban pynlong ïa ka jingtohkit kaba bniah.
Katkum ka khubor ba la ïoh lum, la ïathuh ba katei ka longkmie kaba la don ar ngut ki khun, ïa kaba la tip kyrteng kum ka Kong Sperly Syngkli, 27 snem ka rta na ka shnong Umkaduh, Ri Bhoi District kala leit bud ïa la u lok, uba la tip kyrteng kum u Kursur Mawlong sha Maroit myn ha ka sngi Saitjaiñ kaba la dep, hynrei tang saw sngi hadien, kata ha ka sngi Ba-ar, la ïoh jingtip ba katei ka longkmie kala khlad kyndit noh.
La ïathuh ruh tang hadien ba la tip ïa ka jingkhlad katei ka longkmie, ki bahaïing hasem ki la leit sha ka shnong Maroit bad hynnin hi ka janmiet la wanrah noh ïa ka met kaba sah jong ka sha Umkaduh na ka bynta ban pyndep ïa ka jinglehniam kaba khatduh. Kaei kaba la pynsuba jur ïa ki bahaïing hasem katei ka longkmie ka long ba utei u lok ha ryngkat ki bahaïing jong u, ki la phet jyndat noh hynne ka step khlem da ap shuh wat ïa ka jingpyndep ïa ka lehniam lehrukom kaba khatduh ïa ka met kaba sah jong katei ka longkmie kaba dei ka lok ka jong u.
Halor kane ka jingsuba sniew, ki bahaïing kila pyntip noh sha ki bor pulit bad mynta ka sngi ïa ka met jong katei ka longkmie la pynkit noh sha Civil Hospital Nongpoh na ka bynta ban pyndep ïa ka post mortem bad ruh ban lap ïa ka jingshisha ha kano ka dur katei ka longkmie kala khlad.
Katkum ka jingïathuh jong u Rangbah Shnong, Bah Phaintis Syngkli bad u Kni Bah Mekhal Syngkli, la ong ba ki dap da ka jingsngewlyngngoh halor ka jingkhlad kane ka bahaïing ka jong ki naba ka leit bud ïa la u lok tang ha ka sngi Saitjaiñ hapdeng ka met kaba shait ba khlain, hynrei kyndit kyndit ha ka step sngi Ba-ar, kila ïoh pynban ïa ka khubor ba kala khlad noh.
Ki la ïathuh ruh ba haba ki bahaïing kila leit sha ka shnong Maroit, utei u lok jong katei ka longkmie, um shym la kren shai satia halor kano ka rukom ba kala khlad bad na ka liang ka jong ki, kim tharai ba kan khlad ha ka jingshitom, hynrei kila kynnoh ba lehse ka don ka jingïabakla bad utei u lok bad suba jur ba lehse u dei u lok uba donkti.
Kaei kaba la pynsuba jur shuh shuh ïa ki, kila ïathuh ba ka dei ba tang hynnin janmiet dang wanrah ïa ka met, hynrei mynta mynstep pat u lok lem bad ki bahaïing kila phet jyndat noh ha ka por step phyrngap khlem da ap shuh wat tang ban pyndep ïa ka jinglehniam khatduh.
Na ka liang ki bahaïing katei ka longkmie, kila pynpaw ba kum ka ïing ka sem, ki dap da ka jingsngewsih kaba khraw halor ka jingkhlad kyndit kane ka longkmie bad kyntu ïa ki bor pulit ba kin pynlong ïa ka jingtohkit kaba bniah ban lap ïa ka jingshisha baroh bad ban pynshitom ïa kiba donkti hapoh ki kyndon aiñ kiba tyngeh.
