Shillong, Risaw 07
Ka sorkar Karnataka ka la pynbna ïa ka khusnam pisa kaba heh na ka bynta ki nongïalehkai jong kane ka jylla kiba la ïashim bynta ha ka Asian Games 2026, kynthup ïa ka jingkyntiew ïa ki khusnam na ka bynta ki nongïoh takma, ki khusnam ba leit ïashim bynta bad ka jingkyrshan ba kham bun na ka bynta ka jingpynkhreh ïa ka Olympic.
Katkum ka jingpynpaw da ka tnat ïalehkai jong katei ka Jylla, 20 ngut ki nongïalehkai ka Karnataka kiba la ïoh shim bynta ha ka Asian Games 2026 kin ïoh T.5 lak marwei kum ka jingai jingkyrshan halor ka jingleit shim bynta. Kane ka dei ka sien kaba nyngkong ba la pynbna ïa kum kane ka jingai jingkyrshan na ka bynta baroh ki nongïalehkai kiba dei hok ban ïashim bynta.
Ki khusnam kiba kham hashwa ki long T. 35 lak na ka bynta ka takma ksiar, T. 25 lak na ka bynta ka takma rupa bad T. 15 lak na ka bynta ki takma rnong, hynrei mynta la kyntiew sha ka T. 1 klur na ka bynta ka takma ksiar, T. 75 lak na ka bynta ka takma rupa bad T. 50 lak na ka bynta ka takma rnong.
Kane ka jingpynbna ka la wan hadien ba ka sorkar Karnataka ka la shah kynthoh halor ka takma ksiar ba la khur da ka M.R. Poovamma bad kane ka pyni ïa ka jingtbit jong ka.
Na ka liang ka Poovamma bad ka ïing ka sem jong ka ki la pynpaw ïa ka jingsngewsih ba ym shym la don kano kano ka jingkhot ne ka khubor ai khublei ka ban wan na ka sorkar jylla ne ka tnad ïalehkai hadien ba ka la khur ïa ka takma ksiar ha ka jingïamareh 4x400m jong ki kynthei.
Ka Poovamma ka la ong ba ym shym la don kiba pynpaw ka jingai khublei ïa ka, hashwa ba u Myntri Rangbah kane ka jylla u D.K. Shivakumar bad u Symbud Myntri Rangbah u G. Parameshwara kin wad ïa ka.
Ki 8 ngut ki nongïalehkai ka Karnataka kiba la khur takma ha ka Asian Games kin ïoh lang haduh T. 8 klur kum ka khusnam pisa, ong ka Sorkar.
Ka khusnam kaba heh duh shimet kan leit sha ka Shreyanka R Patil, kaba la khur ïa ka ksiar ha ka jingïalehkai kriket ki kynthei, ha kaba ka sorkar kan ai khusnam ïa ka haduh T. 1 klur.
Ka M.R. Poovamma, kaba la khur ïa ka takma rupa ha ka mixed 4x400m bad ka takma ksiar ha ka jingïamareh 4x400m jong ki kynthei, kan ïoh khur ïa ka khusnam pisa kaba long T. 1.75 klur.
Ka Tilottama Sen, kaba la khur ïa ka takma rupa ha ka jingïakob siat suloi ki kynthei kaba 50m, kan ïoh T. 75 lak, katba u Ayush Shetty, u nongïalehkai badminton, uba la khur ïa ka takma rnong ha ka liang ki shynrang, un ïoh T. 50 lak.
