Shillong, Risaw 07
U Pramod Bhagat uba la khur ïa ka takma ksiar ha Tokyo Paralympic bad ka Bhavina Patel kaba la khur takma ksiar ha ka Birmingham Commonwealth Games kin rah ïa ka lama jong ka India ha ka jingplie ïa ka Asian Para Games ka ban long ha ka sngi U Blei (18 tarik) ha Guangzhou, China.
U Bhagat, u long uwei na ki nongïalehkai para badminton jong ka ri India, u la khur jingjop hynriew sien ha ka Asian Para Games hapdeng u snem 2014 haduh 2023, ba kynthup ïa ar tylli ki takma ksiar bad saw tylli ki takma rnong.
Katba ka Bhavina, ka nongïalehkai para table tennis kaba pawnam, ka la khur jingjop ar sien ha ka Asian Para Games, kawei ka takma rupa bad kawei ka takma rnong.
“Ka long ka jingsngew sarong ïa nga ban shah jied kum u nongrah lama jong ka ri India. Haba phi rah ïa ka lama lai rong, phi sngewthuh ba phi mihkhmat ïa kaei kaei kaba kham heh ban ïa phi,” la ong ka Bhavina ha ka kyrwoh.
“Nga sngewkmen ban ïaid ha ka jingïalang plie ryngkat bad u Pramod bad ban ïalam ïa ka kynhun jong ngi. Nga kyrmen ba baroh ki nongïalehkai jong ngi kin ïakhun da ka jingshaniah, kin sngewtynnad ïa ka por bad kin ai ïa kaba bha tam na ka bynta ka India,” la bynrap biang ka Bhavina.
Ka Paralympic Committee of India kan pynlong ïa ka jingïalang ha ka sngi Palei na ka bynta ban ai khublei kitbok ïa ka kynhun jong ka ri. U myntri ka tnad ïalehkai u Dr Mansukh Mandaviya un ïadonlang kum u kongsan, katba ka myntri khynnah ba dei khmih ïa ka tnat ïalehkai ka sorkar pdang ka Raksha Nikhil Khadse kan long kum ka symbud kongsan.
Ha katei ka Aichi-Nagoya 2026 Asian Para Games yn wan shim bynta da ki nongïalehkai na kylleng ka dewbah Asia, ha kaba ka India ka la khmih lynti ba kan wanphai da ka jingkhlaiñ bor ha knae ka lympung ïalehkai bar ri.
Lah ban kdew ka India ka la khur 111 tylli ki takma, kynthup ïa 29 ki takma ksiar, ha ka Hangzhou Asian Para Games 2022.
