Shillong, Risaw 08
Ka kynhun ïalehkai U-17 ka ri India ka la bteng biang ïa ka jingjop ha ka lympung ïaknieh rung AFC U-17 Women’s Asian Cup China 2027, hadien ba ka la lah ban pynliem noh ïa ka Syria da 2-0 kol ha ka jingïalehkai jong ka Group-E ha ka sngi Palei ha MP Selayang Stadium kaba ha Selayang, Malaysia.
Ka Anushka Kumari, kaba la ïoh ban thep san kol ha ka jingïakhun ba ka India ka la jop da 14-0 kol pyrshah ïa ka Iraq ha ka jingïalehkai kaba nyngkong, ka la ïoh ban thep mar shi kol ha ka kylla step bad kylla miet na ka bynta ban pynlong ïa ka ba kan kynjoh sha ki 7 kol.
Kane ka jingjop ka la pynlong ïa ka India ba kan kamai 6 poiñ na ki ar sien ïakhun hashwa ba kan pynkhreh ïa ka jingïakhun kaba khatduh ha ka Group-E pyrshah ïa ka Malaysia ha ka 11 tarik mynta u bnai.
Kat kum ka prokram, la ong ba tang ka kynhun ka ban wan ha ka kyrdan ba hakhlieh duh na kawei pa kawei ka group ka ban ïoh rung sha ka AFC U17 Women’s Asian Cup China 2027. Ka Syria ka dei ka kynhun kaba la shah rem da 0-1 kol ha ka Malaysia ha ka jingïaleh -kai kaba nyngkong. Katba ka Malaysia bad ka Iraq kin ïakynduh pyrshah ha katei kajuh hi ka sngi U Blei.
Ha kane ka jingïakhun u coach ka India u la pynneh da kajuh ka kynhun kaba 11 ngut ki ‘thei ïalehkai kiba la ïalehkai pyrshah ïa ka Iraq ha ka jingïalehkai ba la lah. Hynrei ki ‘thei ïalehkai ka India ki la lah ban pynpaw ïa ka jingtbit ha ka rukom ïalehkai bad ban buh jingeh ïa ki ‘thei ïalehkai ‘dien ka Syria.
Tang mar ïasdang ka jingïalehkai ka India ka la ïoh ban pynkhih jar ha ka minit kaba 6 lyngba ka Anushka. Kane ka la wan hadien ba ka ‘thei ïalehkai ‘dien ka Syria ka Bayab Jomaa Ato ka la pynur ïa ka Silky Devi Sorokhai-bam habar jong ka ‘penalty area’. Te kum ka Redima Devi Chingkha-mayum ka la shut ïa ka free-kick, ha kaba ka Bayab ka la pyndei da ka khlieh ïa ka bol bad ka Anushka ka la ïoh ban pynkhih jar.
Kane ka shi kol ka la pynïoh mynsiem ïa ki ‘thei ïalehkai ka India na ka bynta ban ïalehkai bha shuh shuh, ha kaba ka la ïoh ïa ki kabu kiba biang hynrei kam shym la lah ban pynurlong haduh kaba kut jong ka kylla step na ka daw ka jingïashah tyngeh ki ‘thei ïalehkai ka Syria.
Hadien shiphew mi-nit ba la bteng ïa ka jingïakhun jong ka kylla miet ka Anushka ka la pynbud ïa ka kol kaba ar na ka bynta ban pynlong ïa ka India ban tam da 2-0 kol.
Ïa kane ka jingïalehkai la pynsangeh ha ka minit kaba 58 na ka daw ka jingtied u pyrthat bad ka leilieh. Hadien ka jing-sangeh kumba shiteng kynta na ka daw ka jingbteng ka jingjur slap, hynrei la la lah ban bteng biang ïa ka jingïalehkai haduh kaba kut.
