Shillong, Risaw 08
Ha ka janmiet jong ka 08 tarik u Risaw 2026, ki nongtrei na ka Shillong Municipal Board (SMB) ha ryngkat ki bor pulit, ki la leit ban khanglad ïa ki nongdie jingdie harud surok bad lynti ïaid kjat kiba ju shongdie ïa ki mar ki mata harud lynti ha Jail Road, Shillong.
Kane ka jingkhynra bad khanglad ka long katkum ka hukum ban ym shah shuh ïa ki nongdie madan ha katei ka jaka, ban buh bad phriang ïa ki mar ki mata harud lynti ba ïaid ki paidbah.
Ha kane ka jingwan jong ki pulit bad ki nongtrei ka SMB, la mih ka jingïapyni bor bad jingïania ktien bad ki nongdie madan bad ki pulit ki la ker pyllun ïa ka jaka ha kaba ki nongdie ki ju shongdie bad ki la khang ruh ïa ki briew ban rung na katei ka lynti.
Na ka liang ki nongtrei kiba don ha katei ka jaka, la phah ïa ki paidbah ban pyndonkam da kawei pat ka lynti kaba na shaneng.
Haba kren halor ka jingïania kaba mih hapdeng ki nongdie madan bad ki bor na ka Shillong Municipal Board, ki katto-katne ki longkmie nongdie jingdie ki la pynpaw ïa ka jingbymhun jong ki halor ka rukom treikam jong ka Provisional Town Vending Committee (PTVC).
Ki la ong ba ki la leit sha ka jingpynshai ne hearing jong ka PTVC, hynrei ki briew kiba don ha katei ka committee ki leh katba mon bad ki ai Certificate of Vending (CoV) katkum ka mon jong ki.
Ha kajuh ka por, ki nongdie madan ki la dawa na ka Shillong Municipal Board, ban siew ïa ka bai lutksan halor ki mar jingdie jong ki.
Ki la pynpaw ba na ka jingkhanglad kynsan, ki jhur bad kiwei ki mar kiba lah ban pynlut, ym shym la ïohlad shuh ban die, bad ki hap ban bret noh.
Ki la dawa ba ka SMB kan shimkhia halor ka jingduhnong jong ki bad kan pynbeit ïa ka jingeh kaba ki nongdie madan ki mad.
