Shillong, Risaw 08
Ka Mawkhar SC ka la ïoh rung sha ka semi final na ka Group-B ha ka lympung ïalehkai 1st Division Football League 2026 ba la pynïaid da ka Shil-long Sports Associa-tion (SSA), hadien ba ka la pynliem ïa ka Ryntih SC da 3-0 kol ha ka sngi Palei.
Kane ka jingjop ka la pynlong ïa ka Mawkhar ba kan bat ïa ka kyrdan ba hakhlieh da kaba kamai 8 poiñ ha ki saw sien ïakhun hadien ba ka la jop ar sien bad ïakhaid ar sien.
Haba phai sha katei ka jingïakhun, ki rangïalehkai jong baroh ar ki kynhun ki la lah ban ïalehkai bha naduh kaba sdang. Ka Mawkhar ka la pynkhih jar hashwa ban kut ka jingïalehkai jong ka kylla step lyngba u Pynshai Manik Kharbani (54).
Ka Mawkhar ka la thep biang sa ar kol ha ka kylla miet lyngba u Emanuel Rongrin (74) bad u Donbok Sohtun (87) na ka bynta ban khur ïa ka jingjop.
Haba phai sha kawei pat ka jingïakhun jong kane ka group, ka Pohkseh SC ka la pynliem noh ïa ka Nongrim Hills SC da 2-0 kol. Ïa kine la thep da u Shining Nongdhar (35) bad u Reinjoywell Wartdi (79).
Watla ka la khur ïa ka jingjop, pynban ka Pohkseh (7 poiñ) ka la duh ban rung sha ka semi final namar ka Mylliem Lum (7 poiñ) kaba wan ha ka kyrdan ba-ar, ka la tam lyngba ka jingïapher ha ka jingthep kop.
Te kumta ka Mylliem Lum ka la ïasoh lang bad ka Mawkhar ban jam sha ka semi final na kane ka group.
Katba na ka Group-A ki kynhun kiba la rung sha ka semi final ki long ka Nongkrem SC bad ka Malki SC.
Na ka liang ka SSA ka la pynbna ba ïa ki jingïakhun semi final yn pynlong ha ka 15 tarik mynta u bnai ha SSA Stadium. Ka Nongkrem kan ïakynduh pyrshah ïa ka Mylliem Lum ha ka por 12:30 mynsngi bad ka Mawkhar ïa ka Malki ha ka por 4 baje nohphai sngi.
Katba ïa ki jingïalehkai ïaknieh lait hiar (relegation zone) yn pynlong tang ha kawei ka wat jingïakhun, ka ban sdang ha ka 13 tarik bad kan kut ha ka 19 tarik, kaba dei artad ka jingïakhun final jong kane ka lympung.
