Nongstoiñ, Risaw 08
Ka ophis jong ka District Medical & Health Officer (DMHO) West Khasi Hills District, ha ka sngi Palei kala pynlong ïa ka prokram rakhe ïa ka sngi pyrshah duma (World No Tobacco Day) 2026 ha Nongstoiñ Complex Auditorium, New Nongstoiñ, ryngkat bad ka phang pdeng “Unmasking the Appeal … Countering Nicotine and Tobacco Addiction.”
Ha kane ka jingrakhe, la pynsngewthuh ïa ki khynnah skul bad ïa ki paidbah shaphang ki jingma bad ki jingktah ba sniew jong u duma bad nicotine, bad ban pynshlur ïa ki ban kiar na ka jingpyndonkam ïa u duma.
U Bah Gabriel Wahlang, MLA ka Nongstoiñ haba kren kum u Kongsan ha kane ka sngi, u la ong, ka jingim, ka ïing ka sem bad ka koit ka khiah ki long kiba kordor.
U la ong, “Ki rai kiba ngi shim ha ka por ba ngi dang samla ki lah ban ktah ïa ka jingim jong ngi ha ki snem kiban wan.”
Shuh shuh u la pynkynmaw ïa baroh ïa ka kyntien “Health is Wealth” lane “Ka koit ka khiah ka dei ka spah” bad u la kyntu ïa ki paidbah ban kiar na u duma, la ka long ka jingdih ne ka jingbam, namar u duma u lah ban ktah ïa ka met baroh bad ïa ka jingmut jingpyrkhat.
U la ai ruh ïa ka khubor, “Ong em ïa u duma, ong hooid ïa ka jingim”.
Ha kane ka sngi, la ïoh ruh ïa ki jingkren na ka Dr. MK Sohliya, DMHO ka West Khasi Hills District, kaba la batai shaphang ka jingkongsan jong ka sngi Pyrshah Duma, ka Dr. N. Mawrie, State Nodal Officer, NTCP bad NOHP, kaba la ai ïa ka jingkren pdeng, ha kaba ka la pynpaw ïa ka jingdonkam ban bteng ïa ki lad ki lynti ban khanglad ïa ka jingpyndonkam ïa u duma bad nicotine, khamtam hapdeng ki samla.
Nangta, u Dr. B. Myrthong uba la ai ïa ka jingpynsngewthuh halor ka phang “Tobacco Use: Is It Really That Bad?”, ha kaba u la batai shaphang ki jingma kiba lah ban mih na ka jingpyndonkam ïa u duma.
Ym tang katta, na ka tnad pulit ruh ka la ai ïa ka jingpynsngewthuh lyngkot halor ka Cigarettes and Other Tobacco Products Act (COTPA), 2003, bad ki kyndon kiba kongsan kiba ïadei bad ka jingtehlakam ïa u duma, u Dr. LL Mawsor, District Nodal Officer, NTCP & NOHP, West bad Eastern West Khasi Hills District, na ka tnad pule puthi ïa kaba la wan mihkhmat da ka Kong A. Kharbhih, DSEO, bad u Bah E. Marngar SDSEO.
Ha kane ka sngi la pynlong ruh ïa ka jingïakop ïatai (Debate Competition) kum shi bynta jong ka prokram. Nangta ka NTCP Team ka la sam ruh ïa ki khusnam sha ki skul kiba wan shakhmat ha ka Tobacco-Free Educational Institutions (TOFEI) ha ka kyrdan District, bad ïa ki khusnam kiba ïadei bad ka jingpyntreikam ïa ka COTPA bad ka Online Slogan Competition.
La pynlong ruh ïa ka jingkular (pledge) bad ka jingdro ne jingthoh ha ki kynroh (graffiti) kum shi bynta jong ka prokram, ban pynskhem ïa ka jingkut jingmut jong ki nongïashim bynta ban kiar na u duma bad ban ïatreilang ban tehlakam ïa ka jingpyndonkam ïa u duma.
