Shillong, Risaw 08
Ki nongïalehkai badminton, ki nongsiat bad kiwei pat ki khlur ïalehkai ba paw jong ka ri India kin shah bishar bniah, ha kaba ka tnat ïalehkai jong ka Sorkar Pdeng ka la khot ïa ka jingïalang bishar bniah ban ïakren halor ka jingbym lah ïalehkai bha jong ki ha ka Asian Games, la ong ki khubor.
Ka tnad ïalehkai kan bishar bniah ïa ka jingïalehkai jong ka India ha ka Asian Games kaba dangshu kut dangshen, ha ka jingïalang kaba shisngi bad ki synjuk ïalehkai jong ka ri ha ka sngi Ba-ar ha kaba ka badminton, shooting bad athletics ki long kiba kham kongsan ban khmih bniah.
Ka jingpyllait pisa hapoh ka skhim Target Olympics Podium (TOP) jong ka sorkar pdeng yn hap ban bishar bniah. Ka India, ka la khur haduh 85 tylli ki takma, ba kynthup ïa 21 tylli ki takma ksiar ha ka Aichi-Nagoya Games, bad ka la duna bha na ka jingïoh khur 106 tylli ki takma na ka jingïalehkai kaba la dep ha Hangzhou.
“Katto katne ki nongïalehkai kiba la tbit bha ki la paw shai ha ka jaka ba ki don ha ka jingsuk bad ka la paw ha ka jinglehkai jong ki. Ki synjuk ïalehkai jong ka ri kin don bynta lang ha katei ka jingïalang ka lah ban long ha ki khyndiat sngi ban wan, lehse ha ka 13 ne 14 tarik mynta u bnai,” la ong ki tyllong khubor.
“Kawei pat ka mat ka dei ka jingmynsaw. Ki don ki nongïalehkai kiba la pynbna ba ki la mynsaw hadien ba ki la poi sha katei ka lympung; kumno kata ka lah ban long? La pynlut da ki klur tyngka ha kaba pynkhreh ïa ki,” la bynrap shuh shuh ka khubor.
Hashwa katei ka lympung, ka tnat ïalehkai ka la pynpaw ba ka la pynlut palat T. 700 klur ban pynkhreh ïa ki nongïalehkai ka ri ha ki lai snem.
Ki khlur ïalehkai ba paw ki bym lah ban khur takma ha ka Asian Games ki long ka PV Sindhu kaba khur takma teng ar sien ha ka Olympic, kumjuh u Lakshya Sen lem bad ki nongïalehkai doubles kata u Satwiksairaj Rankireddy bad u Chirag Shetty.
Katba u Lakshya bad u Satwik-Chirag ki la don bynta ban khur takma rnong ha ka jingïalehkai kynhun (men’s team), katba ka kynhun jong ki kynthei kam shym la lah ban khur takma.
Ha kawei pat ka liang ka Manu Bhaker kaba la khur takma ar sien ha ka Olympic, ka la wan ha ka kyrdan ba san ha ka 10m air pistol final bad kam shym la lah ban rung sha ka final jong ka 25m pistol. Ka India ka la wan ruh ha ka kyrdan kaba san ha ka 25m pistol team event, kaba la pynlong ïa ka Bhaker ba kan ym lah ban khur takma ha katei ka lympung.
U Avinash Sable uba la khur takma ksiar ha ka Asian Games 2022, u la wan ha ka kyrdan kaba saw ha ka jingïakob mareh 3000m steeplechase jong ki shynrang, ha kaba u la duh noh ïa ka takma rnong kumba saw sekhon. Hadien kata u la weng noh ïalade na ka jingïakop mareh kaba 5000m.
