Khliehriat, Risaw 08
Ka Ladrymbai Dongwah SWSC ka la khur jingjop ha ka lympung ïalehkai 1st Division, katba ka Chiehruphi SYWSC bad Byndihati CSC ki la ïasam mar shi poiñ ha ka Super Division ba la pynïaid da ka East Jaiñtia Hills District Football Association ha ka sngi Palei.
Ha ka jingïalehkai jong ka 1st Division na ka bynta ka Thomas Nongtdu Memorial Trophy, ka Ladrymbai Dongwah SWSC ka la pynliem noh ïa ka Lakadong Umlatdoh SCSC da 4-2 kol.
U Deepson Tokbi ula khyrwit da ka hat-trick hadien ba u la thep ha ka minit kaba 12, 45+2 & 77 ha kaba la bynrap sa shi kol da u Aerial Najiar (59). Na ka liang ka Lakadong Umlatdoh ka la ïoh ban thep ar kol lyngba u Phrangsngi Pakem (53), bad u Wanki Amkhloo (74).
Haba phai sha ka Super Division na ka bynta ka 6th Kyrmen Shylla Contribution Trophy hapdeng ka Chiehruphi SYWSC bad Byndihati CSC ki la ïakhaid khlem don ba lah ban thep kol.
