Shillong, Risaw 08
Hadien ba ka Sorkar Jylla ka la pynjlan sa hynriew bnai ïa ka samoi treikam jong ka Garo Hills Autonomous District Council (GHADC) halor ka nongrim ban pyndep ïa ka jingphiah Konstitwensi, na ka liang u Dr. Mukul Sangma, Nongïalam ka Liang Pyrshah ha Ïingdorbar thawaiñ ka Jylla, u la pynpaw ba kine baroh kidei ka jingbym shimkhia ka Sorkar Jylla.
Haba kren sha ki lad pathai khubor ha ka sngi Palei jong ka taïew, u Dr. Mukul Sangma u la ong ba na ka liang jong u, u la kyntu ïa ka Sorkar ba kadei ban shimkhia halor ki kynrum kynram kiba la jia ha rilum Garo hynrei ka khlem leh kumta.
“La ïohi pynban ba ka Sorkar Jylla ka la lapmiet ban sam ïa ki skhim bapher-bapher ha ka jaka ban pynbeit ïa kaba dei ban pynbeit,” la ong u Dr. Mukul.
U la ong ruh ba kam da donkam ban pynjlan ïa ka samoi treikam, hynrei dei ban pyndonkam ïa kane ka por ban pynlong ïa ka ilekshon, khnang ba ki trai jylla kin ïoh ban jied noh ïa la u nongmihkhmat u ban lah ban pyndep ïa ka kamram kaba u dei ban leh.
U Dr. Mukul u la kdew ruh ba u la wanrah ïa kane ka mat hapoh ka dorbar mang tyngka bad ong ba ïane ka kam, ym dei ban shim sting.
Lah ban kdew ba nyngkong la pynkynriah noh ïa ka ilekshon naduh u bnai Ïaïong 2026 hadien ka jingmih jingkulmar ha rilum Garo bad u Lat ka Jylla u C.H. Vijayashankar, dang shen u la mynjur ïa ka GHADC (Second Amendment) Rules, 2026, kaba bthah ba tang ki dkhot jong ka Scheduled Tribe ki lah ban thep vote bad ïakhun, da kaba thaw ïa ka thup thep vote ba kyrpang jong ki ST bad kyntait ïa ki bym dei ki riewlum.
Ka jingpynslem jong kane ka ilekshon ka long kaba donkam ban pyndep ïa ka jingpynbeit, kaba dang ïaid shakhmat ka SIR ïa ki thup thep vote ki ST.
