Aizawl, Risaw:
Ka Mizoram ka la plie ïa ka jaka sumar ban pynsangeh ïa ki briew na ka jingkyrni dih jingdih pynbuaid kaba thymmai ha Sethawn kaba don ha ka distrik Kolasib, ha kaba ka Myntri ka tnad Social Welfare ka Lalrinpuii ka la khot ïa ka jingïatreilang kaba kham khlaiñ hapdeng ki Balang bad ka sorkar ban ïaleh pyrshah ïa ka jingeh jong u drok ha ka jylla.
Ïa kane ka jaka la tip kum ka Jordan Centre la pynkhamti ha ka Synod Mizoram na ka bynta 15 snem hapoh ka jingïateh ba la ïasoi bad ka sorkar jylla ha u bnai Lber jong une u snem. Ïa kane ka jaka la plie paidbah bad pynkyntang sha U Blei ha ka jingïalang ba la long ha ka sngi Ba-ar.
Ha kane ka sngi la ïadon ryngkatlang ka Lalrinpuii bad u Moderator jong ka Mizoram Synod u Rev John Raldosanga.
Haba kren ha ka jingplie paidbah, ka Lalrinpuii ka la ong ba ka jingjyllei jong ki nongdih drok ha Mizoram ka dang long ka jingeh kaba khraw.
Ka la batai ïa ki Balang kum ka bor kaba kongsan ha kaba ïaleh pyrshah ïa ka jingdih drok, katba ka la kdew ba ka sorkar bad ki seng trei mon sngewbha kin nang ïai bteng ban ai jingkyrshan.
Ka Myntri ka la ong ba ki jingpyrshang ban ïaleh pyrshah ïa u drok kim lah shuh ban pynleit jingmut tang ha kaba pynduna ïa ka jingpynpoi ïa u drok, da kaba bynrap ba ka tnad Social Welfare ka la nang pynleit jingmut ha kaba pynduna ïa ka jingdawa bad ban pynbha pat ïa kiba pyndonkam ïa u drok.
