Guwahati, Risaw:
Ka kynhun West Guwahati Police District (WGPD) ka la ïohkem ïa arngut ki briew na Bhetapara kaba don ha Guwahati, Assam ha kaba ïadei bad ka mukotduma jong ka jingshah mudui ba ki la donkti ha ka ban wanrah ïa ki jingpynpluh ding, ka jinglute bad ka jingkynnoh ba ki don ka jingthmu ban leh kam sniew, la ïathuh ki pulit. Kine kiba la shah kynnoh ki dei kiba la tip kyrteng kum u Md Jillat Anam, 46 snem ka rta bad u Md Tahid Rajib Anam, 51 snem ka rta, baroh arngut ki dei ki nongshong shnong jong ka Bilasipara ha Dhubri distrik jong ka Assam.
Katkum ka jingïathuh jong ki pulit la ong ba ïa kine ki jingkem la leh da ki pulit jong ka Gorchuk Police Station ha ka por ba ki dang pynlong ïa ka jingkhynra ha ka thaiñ Bhetapara.
Ki pulit ki la ïathuh ba la ïoh kurup shibun ki tiar kiba la suba ba ki donkti ban pynlong ïa ki arngut kiba shah kynnoh. Ki tiar ba la ïoh kurup ki kynthup ïa 78 tylli ki mobile phone, kawei ka laptop, 74 tylli ki rubber stamp, 11 tylli ki ATM card, 19 tylli ki passbook bad 37 tylli ki USB Drive.
Ka kynhun pulit ka la kurup ruh ar tylli ki printer, uwei u shabi jong ka kali Scorpio, 42 tylli ki kot cheque bad ka pisa T.2,73,500, ryngkat kiwei pat ki kot ki sla kiba la kynnoh ba ki don bynta bad kane ka kam.
Ïa kine ki arngut la kem ha kaba ïadei bad ka mukotduma ba la mudui halor ka jingkynnoh pynpluh ding, lute bad jingthmu ban leh kam sniew. Ka jingpyntreikam katkum ka aiñ ka dang ïai bteng haduh mynta, la ïathuh ki pulit.
