Shillong, Risaw 08
Ka Sawmer SC ka la lah ban pynliem ïa ka Mylliem da 2-1 kol ha ka jingïalehkai kaba khatduh jong ki ha ka Shillong Premier League 2026, ha ka sngi Palei ha SSA Stadium, Polo.
Watla u Daohipaia Rymbai (45?) u la pynkhih jar nyngkong na ka bynta ka Mylliem hashwa ban kut ka jingïalehkai jong ka kylla step, hynrei ka Sawmer ka la wanphai da ka jingkhlaiñ bor ha ka kylla miet ha kaba ka la lah ban pynphai kylla ar kol lyngba u Banteilang Lyngdoh (77′) bad u Bickyson Kharkongor (81′).
Lyngba kane ka jingjop, ka Sawmer (12 poiñ) ka la kiew ar kyrdan kata na kaba hynñiew sha kaba san, ha kaba ka la pynlong ïa ka ban don jingkyrmen na ka bynta ban ïoh rung sha ka SSA Super Cup hadien ba la kut ka SPL. Kane ka mut ba tang ki kynhun kiba don ha ka thup kaba hynriew ne Top 6 ha ka SPL kiba lah ban shim bynta ha ka Super Cup. Watla katta ka Sawmer ka danghap ban ap na ka jingmih jong kiwei pat ki jingïakhun kiba dangsah namar ka Meghalaya Police (11 poiñ) bad ka Rangdajied United (10 poiñ) ki dangdon ha ka jingïaknieh ban ïoh rung.
Ka Mylliem ka la pynkut da kaba ka la wan ha ka kyrdan ba shatrai ha kaba ka la khur tang 1 poiñ hadien ba ka la ïakhaid shisien bad shah rem ha ki phra sien ïakhun. Te kumta kane ka kynhun ka la shah pynhiar sha ka First Division bad ban shim bynta ha u snem ban wan.
Ha kane ka jingïalehkai ki la don katto katne ki kabu kiba la ïoh ban shut najngai da ka Mylliem ha ka kylla step, hynrei kane ka jingpyrshang ka la wan urlong ban thep shi kol lyngba u Daohipaia ha kaba u rangapkol ka Sawmer u Urbanity Makhroh um shym la lah ban khanglad na ka jingshah thep.
Ha ka jingshisha u Diego Khyriem u la dei ban pynïakhaid na ka bynta ka Sawmer ha kaba sdang jong ka kylla miet, hynrei ka bol kaba u la ïoh ban shut ka la her shabar. Ha kawei pat ka liang u Remark Kharmalki u la ïoh ban shut ha kaba ka la leit dei na diengkol. Dei ha ka minit kaba 77 ba u Banteiland u la lah ban pynurlong lyngba ka jingïarap pynbuh da u Franklyn Surong. Khyndai minit shwa ban wai ka Sawmer ka la thep biang sa shi kol hadien ba u Diego u la pynbuh na ka bynta u Bicky, u bym shym pynlehnohei ïa ka kabu ksiar.
Ka jingïalehkai ha ka sngi Thohdieng kan long hapdeng ka Meghalaya Police F.T pyrshah ïa ka Laitkor ha ka por 3 baje nohphai sngi. Lada ka Laitkor kan mad ïa ka jingshah rem, kan hap ban synran lang ïa ka Mylliem sha ka First Division, katba ka MLP kan pynthikna ban rung sha ka Super Cup.
