Shillong, Risaw 08
Ka Khasi Students’ Union (KSU) Sengkmie ka la pynrem jur ïa ka jingpyrshang jong u Symbud Myntri Rangbah ka Jylla ba khmih ïa ka tnad Kam Pohïing Bah Prestone Tynsong ban pynïasnoh ïa ka jingïaid paidbah da ki thuk-thuk jong ka KSU kaba la long ha ka 19 tarik Nailar bad ki kam lum pisa beaiñ jong ki pulit kiba hap hapoh ka jingpeit bad jingkhmih jong u lyngba ki lad pathai khubor ba u la kren ha ka 6 tarik u Risaw 2026.
Ha ka kyrwoh khubor ba la pyllait da u Information and Publi-city Secretary samla Pynshai Kupar M Dkhar la ong, ki san tylli ki mat kiba ka KSU ka dawa na ka Sorkar, ki dei kiba shong nongrim, na bynta ka bit ba biang ka jaidbynriew.
Ka jinglum pisa beaiñ ne ka jingleh bakla jong ki pulit bad ka jingïakhih paidbah jong ka KSU ki dei ki mat kiba ïapher. Ka jingpynïasnoh ïa kine baroh kam pynjah ïa ki jingkylli kiba ki paidbah ki buh ïa ka tnad Kam Pohïing, hynrei ka pyni tang ïa ka jinglong khynnah ka jong u Bah Prestone kum u nongmihkhmat paidbah ban da rapjot ïa ka dud kaba la shlei ha madan bad kaba phi la pyllait ïa ka miaw kaba la mih na ka byrni ka jong u.
“Ko Bah Prestone kumba phi ju ong bad hikai shwa ban kren da pyrkhat shispah sien, lym kumta, ki kyntien kiba phi thmu ban ïada ïa kiba donkti bad ïa phi ki lah ban wanphai biang bad ktah ïa phi kham jur ban ïa ka jingkylli kaba phi pyrshang ban phet na ka,” ong ka kyrwoh.
“Lada ka tnad Kam Pohïing ka la poi haduh u pud ba kam lah shuh ban pynbeit ne ban ai jubab shai halor ka jingleh jong ki briew kiba hap hapoh ka jingpeit jong ka, te ka jingkylli kaba ki paidbah ki dei ban buh kam dei shuh “Mano kita ki nongpynkulmar ha ka jingïaid paidbah jong ka KSU?” hynrei “Mano hi u nongpeit bad nongkitkhlieh ïa ka Home Department?” la ong ka kyrwoh.
Shuh shuh ka KSU ka la ong, “Lada ka jingïalam ïa ka tnad Kam Pohïing ka la long kaba eh palat, ka don ka lynti kaba don burom, kata da kaba hiar noh na ka shuki”.
Ka KSU kan ym shah pynphai lynti da kine ki “political gymnastics” haba la don bad ïohi paidbah ba ki pulit ki la lum pisa beaiñ, te to tohkit mano ba la ai jingbit, tohkit mano ba la ïoh jingmyntoi, bad shim ïa ka sienjam katkum ka aiñ, pynkut ka kyrwoh na u samla Pynshai Kupar.
