Shillong, Risaw 09
Ka Meghalaya ka la sdang ïa ka samoi ïalehkai cricket kaba 2026-27 jong ka BCCI da ka jingjop ha ka U-19 men’s Vinoo Mankad Trophy plate group lyngba ka jingïalehkai pyrshah ïa ka Mizoram ha Bhubaneswar hynne ka sngi.
Ka jingïalehkai ka la pynshongshit naduh basdang haduh baba kut, ha kaba ka Meghalaya ka la lah ban jop ïa kane ka jingïalehkai ba shi sngi da 5 ron.
Hadien ba kam trai ïa ka jingkynting pisa bad jied ban tied shuwa, ka Meghalaya ka la kamai 218 ron hadien ba hap baroh ki wiket ha ki 44.5 over bad nangta ka la khanglad bad pynliem noh ïa ka Mizoram ha ka 213 ron.
U Gaurav Narleng u la long uba kamai ron bun eh da kaba kamai 60 ron na ki 50 bol na ka bynta ka Meghalaya, kaba kynthup ïa ki lai tylli ki four bad lai tylli ki six.
Ha ka jingsdang ban tied, u Pynshngainlang Marwein u la kamai 38 ron, katba u Enrick Suchiang u la noh synniang 28 ron bad u Gaurav Jyoti Thakuria 19 ron.
Ki nongkawang bol ka Meghalaya ki la ïalehkai bha, ha kaba ki saw ngut ki nongtied bol ba nyngkong jong ka Mizoram ki la liem noh tang hapoh ka 21 ron hi. U Lawma (44) bad u Dinpuia (55) ki la lang 92 ron na ka bynta ka ba-san wiket bad don ruh kiwei pat ki jingnoh synniang harum jong ka order, hynrei ka Meghalaya ka la nang pynhap ïa ki wiket ban pynliem noh ïa ka Mizoram ha ki 47.3 over.
U Amul K Ray u la khur 3 wiket ha ki 9 over, katba u Mewankitbok Kharpuri 2 wiket ha ki 10 over. U Benedict Jones Makdoh, u Gaurav Narleng bad u Sameer Choudhary ki la shim ruh mar kawei kawei ka wiket.
Kaba kham kyrpang, hynne ka sngi ka la ïohi ruh ïa ka jingïalehkai ba nyngkong jong ka Meghalaya ha ka U-19 Women’s T20 Trophy plate group ha Guwahati. Hangne ka Meghalaya ka la shah jop ha ka Tripura da 10 wiket.
Baroh artylli ki kynhun jong ka Meghalaya kin ïalehkai biang lashai ka sngi, kaba hap ha ka jingïalehkai pyrshah ïa ka Sikkim ha baroh artylli ki tournament jong ki shynrang bad kynthei U-19.
