Shillong, Risaw 09
Ka kynhun ïalehkai phutbol ka Meghalaya Police ka la pynthikna ïalade ban buh bad don jaka ha ka SSA Super Cup ka ban sa long, hadien ba ka la pynliem noh ïa ka Laitkor da 2-1 kol ha ka sa shi sngi ban kut ka lympung Shillong Premier League 2026 kaba la long ha madan SSA Stadium hynne ka sngi ka 09 tarik Risaw 2026.
U Everestarly Rynjah (41′, 69′) u la thep ar kol na bynta ka MLP bad u Shelbilkstar Kharshilot shi kol (90’+2) na bynta ka Laitkor ha ka por ba kut syndon ka jingïalehkai.
Ka MLP, ba mynta ryngkat 14 poiñ, ka la wan biang ha ka kyrdan ba san da kaba knieh noh ïa ka Sawmer kaba don 12 poiñ, ka bym long shisha ka ban da duhnong na bynta ka samoi ïalehkai ba sdang jong ki ha ka SPL naduh u snem 2018. Ka Laitkor, watla ka la ïakhun tyngeh, ka la lah ban pyndep tang ha ka kyrdan ba 9 ryngkat 6 poiñ bad ki la shah pynhiar kyrdan noh sha ka First Division ha u snem ban wan ryngkat bad ka kynhun kaba don ha trai duh ha ka miej ïakhein poiñ ka Mylliem.
Watla ki la tip lypa ba kim lah ban lait na ka jingshah pynhiar kyrdan naduh shuwa ban sdang kane ka jingïalehkai, ka Laitkor ka la ïalehkai bha hynrei kim shym la lah pynurlong ban ïoh jingjop.
Ha ka minit ba 34 u Kitdor Kharphuli u la thep kol lyngba ka bol ba wan na u Samborwell Mynsong. Katba ka MLP ka la lah ban thep kol tang ha ki minit ba shakhmat hadien ba u Rapborlang Marwein u pashat ïa ka bol sha u Everest. Watla ka suinbneng ka dum slap hynne ka sngi hynrei kane ka jingïakhun kam shym la pynsahnud ïa ki nongpeitkai.
U Everest u la thep kol ha ka sien ba ar lyngba ka khlieh. Watla katta ruh, ka Laitkor kam shym la pyndem hynrei ka la ïakhun tyngeh ban beh ïa ka thong. U Shelbilkstar khatduh khatwai u la lah ban thep kol na bynta ka kynhun.
Lashai ka sngi ka 10 tarik Risaw 2026 kan long ka sngi kaba kut jong kane ka lympung SPL 2026 ha ka ba kin don ki jingïalehkai ki ban rai ïa ka kyrdan ïakheiñ poiñ, ka ban don ka jingkheiñ na bynta ban don bynjta ha ka lympung SSA Super Cup (ka ban kynthup ïa ki 6 tylli ki kynhun ba wan sha khmat na ka SPL) kumjuh ruh sha ka SSA Champions Cup (ka ban kynthup ïa ki ar kynhun kiba wan ha khlieh jong ka SSA).
Ha ka por 1baje kaba don ha ka kyrdan ba ar ka Shillong Lajong kan ïakhun pyrshah ïa ka kynhun kaba don ha ka kyrdan ba hynñiew ka Rangdajied United. Ka jingjop ïa ka Lajong kan pynskhem bad pynneh ïa ka jaka kaba wan ha ka kyrdan ba ar wat la jia kumno kumno ha ka jingïalehkai kaba bud, kaba ha ka por 4:30 janmiet ha kaba sa shisien ka Nongkseh kan ïakhun pyrshah ïa ka Langsning kumba ka la kynduh teng ha ka final jong ka Meghalaya State League kaba la long ha u bnai Jylliew.
