Khliehriat, Risaw 11
U Wendi Nongtdu ula khyrwit da ka hat-trick bad ban pynlong ïa ka Thangskai Tiger SC ba kan thep haduh 7-1 kol pyrshah ïa ka Rymbai Shkenshynriah SC ha ka lympung ïalehkai Super Division na ka bynta ka 6th Kyrmen Shylla Contribution Trophy.
Ïa kane ka lympung la pynïaid da ka East Jaiñtia Hills District Football As-sociation (EJHDFA) ha madan Diengshynrum, Khliehriat ha ka sngi Saitjaiñ.
U Wendi uba la khur ïa ka hat-trick hadien ba u la thep lai kol ha ka minit kaba 43, 49 bad 59. Kiwei dei ki rangïalehkai jong ka Thangskai Tiger SC kiba la ïoh ban thep kol ki long u Ksankupar Khongmalai (21), Yomi-O Syih (25), Phransis Mukhim (41) bad u Rukipaya Syrti (66). Katba ka shi kol jong ka Rymbai Skhenshynriah SC la thep da u Dauruhi Pale ha ka minit kaba 75.
Haba phai sha ka jingïalehkai jong ka kyrdan 1st Division na ka bynta ka Thomas Nongtdu Memorial Trophy, ka Musniang SC ka la jop da 3-0 kol ïa ka Jalyiah Utd SC.
Ïa ki kol na ka Musniang SC la thep da u Mardiphone Rymbai ha ka minit kaba 47, kumjuh u Dawansalan Malang (50) bad u Jespar Lamare (55).
