Amlarem, Risaw 11
Ka Amlarem Sub-Divisional Sports Association (ASSA), ryngkat ka jingïatreilang bad ka ophis Sub-Divisional Officer (Civil), Amlarem Sub-Division, ka la sdang ïa ka lympung ïalehkai Amlarem Football League kaba long shibynta ka jing-rakhe ïa ka Golden Jubilee ne ka jingdap 50 snem ka Amlarem Sub-Division.
Ïa kane ka lympung la plie da u Myntri ka tnat pule puthi ka Sorkar Jylla bad uba long u MLA ka thaiñ u Bah Lahkmen Rymbui ha ka sngi Saitjaiñ ha Mini Stadium, Ladjaplem.
Haba ai jingkren ha ka jingïa-lang, u Bah Rymbui ula pynpaw ïa ka jingdonkam jong ka jingïalehkai ha ka ban kyntiew ïa ki samla ka thaiñ kiba don ïa ki sap ïalehkai.
U la pynpaw ka jingangnud bad jingthmu jong ka ban pynkhlaiñ ïa ki jingtei ïa ki jaka ïalehkai hapoh ka Constituency kynthup ka jingtei thymmai ïa ka madan ïalehkai ha Ladjaplem kaba la ïoh jingïarap pisa T. 55 lak.
U la ban jur ruh ïa ka jingdonkam jong ka jingkitkhlieh, ka jingïatreilang hapdeng ki tnad sorkar, ki paidbah bad ki nongmihkhmat khamtam haba phai sha ka jingpynkhreh ka Jylla ïa ka National Games ha u snem 2027.
Kum shi bynta ban kyrshan ïa kane ka lympung, u Bah Lahkmen ula pynbna ruh ïa ka khusnam pisa na ka bynta ki saw tylli ki kyrdan ïalehkai.
Ha ka Super Division, ka khusnam na ka bynta ka kynhun lahduh ka long T. 1 lak, ba-ar T.60,000. Ha ka 1st Division ka khusnam ïa ka kynhun lahduh ka long T.60,000 bad ba ar T.40,000. Ha ka 2nd Division ka lahduh kan ïoh T.30,000 bad ba ar T.20,000, katba ha ka 3rd Division ka lahduh kan ïoh T.25,000 bad ka kynhun kaba wan ba ar kan ïoh T.15,000.
Na baroh 4 tylli ki kyrdan ïalehkai la don haduh 92 tylli ki kynhun, kynthup 36 tylli ki kynhun ha ka 3rd Division, 28 tylli ha ka 2nd Division, 20 tylli ha ka 1st Division bad 8 tylli ki kynhun ha ka Super Division.
La sdang ïa ka Amlarem Football League da ka jingïalehkai jong ka Super Division, ha kaba ka jingïakhun ka la kut noh khlem da lah ban pynkhih jar hapdeng ka Lamin XI SCC bad ka Amlarem Social Club.
