Shillong, Risaw 11
Ka Punjab FC ka la pynbna ïa ki 27 ngut ki rangïalehkai, kynthup ïa u rangïalehkai phutbol ka Jylla u Ricky John Shabong na ka bynta ka aïom ïalehkai Indian Super League 2026-27.
Kane ka kynhun kan pynkhreh ïa ka jingïalehkai kaba nyngkong ha ka ISL pyrshah ïa ka Odisha FC ha ka 14 tarik mynta u bnai ha nongbah Delhi.
Na ka liang u coach ba thymmai kane ka klob u Pavlos Dermitzakis u la pynskhem biang ïa ki 14 ngut ki rangïalehkai kiba la don bynta bad kane ka kynhun ha ka aïom ba la lah, kynthup ïa ki rangïalehkai kiba la don bynta hapoh ka kynhun ïalehkai ka ri India kata u Ricky, Bijoy Varghese, Muhammed Uvais, Nikhil Prabhu and Muhammad Suhail F ryngkat u Arshdeep Singh, Khaiminthang Lhungdim bad u Leon Augustine.
Kumba ka paw u Ricky u la don bynta bad ka Punjab naduh ka aïom ïalehkai 2023-24 bad ha ka aïom ba la lah u la ïoh ban ïalehkai 13 sien n aka bynta katei ka klob.
Kane ka klob ka don ruh ïa ki rangïalehkai nabar ri kiba kynthup ïa u Patrick Bahanack, Mickaël Malsa, Diego Raposo, Alfred Planas Moya bad u Raphaël Messi Bouli. Ka la soi thymmai ruh ïa ki ar ngut ki rangïalehkai kiba kynthup ïa u Mohammad Inam bad u Gurkirat Singh.
Kane ka kynhun ka kynthup lang ruh ïa ki 10 ngut ki rangïalehkai kiba la san na ka shlem ai jinghikai. Kine ki long u rangapkol u Ayush Deshwal, kumjuh u rangïalehkai shapdeng u Manglenthang Kipgen bad ki rangïalehkai shakhmat u Muhammad Suhail F bad u Vishal Yadav, ha ka bynta kaba shadien ki long u Ngarin Shaiza, Sohel Khan bad u Karish Soram, shapdeng u Bishu Sharma bad u Laishram Rishikanta Meitei, bad ha ka bynta ba shakhmat u long u Konsam Sanathoi Singh.
Na ka liang u Dermitzakis u la pynpaw ïa ka jingshaniah ha ka kynhun bad ka jinglong ba la pynkhreh jong ka na ka bynta kane ka samoi, da kaba ong, “Kane ka dei ka kynhun ka long kaba biang bad nga sngewkmen shibun eh ïa ka jingïahap jingmut kaba ngi don. Ki rangïalehkai kiba long ba la pynkhreh na ka bynta ban sdang ïa kane ka lympung.”
