Shillong, Risaw 12
Ki nongïalehkai ka Meghalaya Triathlon Association (MTA) ki la khur 9 tylli ki takma ha ki jingïakhun Triathlon bad Duathlon ha ka lympung ba nyngkong tam jong ka Hillman 51.5 Assam Triathlon ba la long ha Charan Beel, Morigaon jong ka jylla Assam ha ka 11 tarik mynta u bnai.
Ha kane ka lympung, la wan ban ïashim bynta da ki spah ngut ki nongïalehkai na kylleng ki jaka bad khamtam na ka jylla Assam bad Meghalaya.
Ïa ki nongjop la lamkhmat hi da ka President jong ka MTA ka Kong Rephica Pde kaba la wan nyngkong ha ka jingïakhun Duathlon (Olympic Distance) kaba kynthup ïa ka jingmareh kaba 5 km bud sa jingñiah saikil kaba 40 km bad bud biang sa da ka jingmareh kaba 10 km. Ka Kong Rephica ka la wan nyngkong napdeng kiba la don palat ka 41 snem ka rta.
U Dr. Ardonister Lyngdoh u la wan nyngkong ha ka jingïakhun Triathlon (Olympic Distance) kaba kynthup ïa ka jingjngi kaba 1.5 km, ka jingñiah saikil kaba 40 km bad ka jingmareh kaba 10 km. U Dr. Ardonister u la wan nyngkong napdeng kiba la 41 snem ka rta shaneng.
Ha ka Duathlon (Sprint Distance) kaba kynthup ïa ka jingmareh kaba 2.5 km bad bud sa ka jingñiah saikil kaba 40 km bad hadien kata sa ka jingmareh kaba 2.5 km, ka samla Ibankdup Nongbet ka la wan nyngkong napdeng kiba 22 haduh 40 snem ka rta.
Shuh shuh kiba la ïoh khur takma ki kynthup ïa u Bah Shaikupar Kharshiing ha ka Duathlon (Olympic Distance) ha kaba u la wan ha ka kyrdan kaba ar napdeng kiba la palat 41 snem ka rta; ka samla Sumarbiang Mawlong ka la wan ba ar ha ka Triathlon (Olympic Distance) napdeng kiba don 22 haduh 40 snem ka rta; u James Anderson Kharlyngdoh u la wan ba ar ha ka Triathlon (Sprint Distance) napdeng kiba 14-21 snem ka rta; u William K Sangma u la wan ba ar ha ka Triathlon (Sprint Distance) napdeng kiba 22 haduh 40 snem ka rta; ka samla Balasiewdor Wahlang ka la wan ba ar katba ka samla Steffi Grace K. Marbaniang ka la wan balai ha ka Triathlon (Sprint Distance) napdeng kiba la don 22 haduh 40 snem ka rta.
Kane ka jingjop jong ki nongïalehkai ka MTA ka bud hadien ba ki la jop ha sor Pune ha ka lympung kaba la pynlong da ka Indian Triathlon Federation kaba la long ha u Nailar 2026. Ha kato ka jingïakhun, ki nongïalehkai ka MTA ki la jop haduh 6 tylli ki takma.
Ïa kane ka synjuk la seng dang ha u Jylliew mynta u snem kum shi bynta ban pynkhreh bad jied ïa ki nongïalehkai Triathlon na Jylla bad ban ïashim bynta ha ki lympung jingïakhun bapher-bapher.
Kiwei pat ki nongïalehkai na ka MTA kiba la ïashim bynta ki kynthup ïa u samla Khrawkupar Lyngdoh, Gary Swett, Naphi-sabet Nongbet bad Naphi Lyngba kiba la lah ban pyndep ïa ka jingïakhun Triathlon ha katei ka lympung.
