Amlarem, Risaw 12
Ka lympung ïalehkai 2nd Division bad 1st Division Football League ba la pynïaid da ka Amlarem Sub-Divisional Sports Association (ASSA) ka la sdang ha ka lah sngi U Blei ha Mini Stadium kaba ha Ladjaplem.
Ha ka jingïalehkai jong ka 2nd Division, ka Amsotai SC ka la pynliem noh ïa ka Pdengkseh SC lyngba ka shi kol ba la thep da u Aibanskhem Surong ha ka minit kaba 46.
Ha ka jingïalehkai kaba bud, hapdeng ka Padu Mawsku SC bad Nongshiliang Pdengshakap SC ki la ïakhaid mar 2-2 kol. Ïa ki kol na ka Padu Mawsku la thep da u Phur Liting (16), bad kawei pat la ïarap pynthep da ka liang pyrshah ha ka minit kaba 37. Katba ïa ki kol jong ka Nongshiliang Pdengshakap la thep da u Various Surong (14) bad u S. Parïong (46).
Haba phai sha ka jingïalehkai jong ka 1st Division, ka Namrhen Ryntih Kudendrim ka la jop da 3-1 kol ïa ka Nongtalang Khla Chympa. Ïa ki kol na ka Namrhen Ryntih la thep da u Jonas Pohleng (11), Lucky Star Tongper (29) bad u Benansious Mukhim (83), katba ka shi kol na ka Nongtalang Khla Chympa la thep da u Emonmi Pohsmen (23).
Ha ka jingïalehkai kaba bud, ka Tympang Club Pdengshakap ka la pynliem noh ïa ka Mupyut Dongwah lyngba ka shi kol ba la thep da u Samuel Sumer ha ka minit kaba 20.
