Shillong, Risaw 12
Ka Seng Samla Seng Khasi Kmie Mawkhar, Shillong ha ryngkat ka jingkyrshan lang ka tnat ïalehkai ka Sorkar Jylla, ka la sdang ïa ka Inter School and Inter College Mawpoiñ Championship 2026 ha ka lah sngi U Blei ha Madan Heh Mini Stadium kaba ha Mawlai Phudmuri, Shillong.
Kane ka lympung ka long shi bynta ban pynkhie im biang ïa kane ka jingïalehkai kaba naduh hyndai hynthai bad ban pynneh pynsah ïa ka khnang ba ki long dien kin ïai kyntiew ïa kane ka jingïalehkai.
Ha kane ka lympung ïalehkai kaba 4 sngi la wan shim bynta da ki skul bad college kiba na kylleng ki shnong jong ka East Khasi Hills district.
Ïa kane ka lympung la plie da u Symbud Myntri Rangbah ka Jylla u Bah Prestone Tynsong kum u kongsan ha kaba la ïadonlang u President ka Seng Samla Seng Khasi Bah Andrew Jana, ki Rangbah, ki longkmie bad ki dkhot Seng Samla Seng Khasi Kmie.
Haba ai jingkren ha kane ka sngi, u Bah Prestone Tynsong u la ai burom bad khublei ïa ki skul, ki kolej bad university, kiba la wan ban ïashim bynta sha kane ka lympung, kaba dei ka jingsdang jong ka ban bteng ha kine ki san sngi.
Nalor kata u Bah Prestone u la ong ba to ai ba kane ka jingïalehkai Mawpoiñ ba nyng-kong tam, kan long shisha kaba jop bad kaba don jingmut.
U pynkynmaw ruh ha ki por ba mynshwa mynba u dangkhynnah samla, ba man ha ka sngi U Blei, uju ïa pynlut por ha la shnong ha Wahkhen naduh dangstep haduh ban da miet ha kane ka jingïalehkai Mawpoiñ, kaba da sngewtynnad bad kaba shitrhem bha haduh katta katta.
U Bah Tynsong u la ong ba ha kum kane ka juk kaba mynta, i kumba kane ka jingïalehkai kan duh kan dam, kumta u ai khublei ïa u Bah Andrew Jana, President ka Seng Samla Seng Khasi Kmie uba ïalam ïa kane ka phang kaba donkam haduh katta katta ban shim khia ïa ka ban wanrah ïa kane ka lympung mynta ka sngi kaba jop bad ba don jingmut.
Shuh shuh u la ong ba wat la la dep pynbiang ïa ki jingïalehkai bapher bapher na ka bynta ka 39th National Games ka ban long ha u snem ban wan, hynrei na ka liang jong u un sa ïakren ban pynrung bad ban pynithuh ïa kane ka jingïalehkai Mawpoiñ kum ka ‘Pre Cultural Games’ ha katei ka lympung kaba heh duh ha ri India.
Ha kaba kut u la ong ba to ai ba kane ka lympung kaba la sdang nyngkong ïa ka naduh mynta ka sngi, kan nang ïai tyllun ban pynjanai shuh shuh ïa ka ha ki snem ki ban wan.
Hashwa jong kane, la ïoh ruh ïa ka jingkren pdiang sngewbha ba la ai da u Bah Andrew bad ïa ka jingïalang la pynïaid da u Rgh. Duwaki Rangad Asst Genl. Secy. Seng Khasi Kmie, la ïoh ruh ïa ka jingpynithuh na ki nongïashim bynta ki skul, kolej bad ki university, nangta ka mass drill da ki kynnah skul ka Seng Khasi HSS, bad ka sur jingrwai ba kyrpang jong kane ka lympung na ka kynhun nongtem nongput Rhem.
Kiba la sakhi lang ïa kane ka jingïalang plie pyrda ka kynthup ïa u President ka Seng Khasi Kmie u Rgh O. Pyngrope, ryngkat ka jingïadon lang ki Vice President bad ki dkhot ka Jylli Pyrkhat Kam (JPK) ka Seng Khasi Kmie, ki dkhot ka Seng kynthei, u MDC barim ka Mawlai u Bah Teibor Pathaw, ki nonghikai bad ki khynnah skul.
Hadien kane, ka la don ka jingpyllait paidbah ïa ki takma bad ki trophy ki ban sa sam sha ki skul bad kolej kiba ïoh rah ïa ka nam lahduh, da u kongsan bad ruh da ki rangbah nongkitkam ka Seng Khasi Kmie.
Hadien ka jingïalang plie, la pyntyllun shakhmat ïa ki jingïalehkai Mawpoiñ jong ki kynthei bad shynrang.
