Shillong, Risaw 13
Ka Laitkyrhong SC bad ka Mawtawar SC ki la khur jingjop ha ka jingïaknieh lait hiar (Bottom League) jong ka 1st Division Football League 2026 ha ka sngi Ba-ar ha SSA Stadium, Polo.
Ha kane ka jingïakhun ka Laitkyrhong SC ka la pynliem noh ïa ka Nongrim Hills SC da 2-0 kol. Ïa kine la thep da u Bisharlang Mawthoh ha ka minit kaba 61 bd kawei pat da u Mebanrikupar Rynjah (82).
Haba phai sha kawei pat ka jingïakhun kaba ar ka Mawtawar ka la pynjem khnap ïa ka Ryntih SC da 7-1 kol. U Donkupar Kharmyndai u la khur ïa ka hat-trick hadien ba u la ïoh ban thep ha ka minit kaba 12, 43 & 68. Ïa ki ar kol la thep da u Damanbhalang Kharbangar (76 & 87), katba ïa kiwei pat la thep da u Pynkhlainbok Wahlang (27) bad u Fedrick Lyngdoh (49). Hynrei hashwa ban wai ka Ryntih ka la lah ban pynphai kylla shi kol lyngba u Dameshwa Malngiang (90+3) hashwa ba kan mad ïa ka jingshah rem.
Kane ka lympung kan bteng biang ha ka sngi Thohdieng (16 tarik) ha kaba ka Nongrim Hills pyrshah ïa ka Ryntih ha SSA Stadium, katba ka Mawtawar ïa ka Laitkyrhong ha madam MFA, Polo. Kine ba ar tylli ki jingïalehkai kin long ha ka por 12 baje mynsngi.
