Shillong, Risaw 13
U General Secretary ka Meghalaya Sport Climbing and Mountaineering Association (MeSCMA), u Bah Wallambok Lyngdoh u la lah ban kiew ïa u lum Bhagirathi II (6,512 mitar) ha Garhwal Himalayas jong ka Uttarakhand.
Kane ka jingjop kaba 18 sien na ki 25 tylli ki jingleit kiew lum ha ka jingïaid lynti ka jong u, kaba pynpaw ïa ka jingaiti, ka jingminot, ka jingshlur, bad ka jingsngew tynnad jong u ban kiew lum.
Kane ka long ka jingsarong kaba khraw na ka bynta ka synjuk bad kumjuh ïa ki paidbah ka Jylla, namar tang hadien ba u la lah ban poi ha kliar lum u Bah Lyngdoh u la bat ïa ka lama barit jong ka MeSCMA, kumjuh ka lama rit jong ka Jylla, bad ka jingai burom ïa ki nongïaleh laitluid jong ka Jylla.
Ka jingjop jong u ka long kum ka jingai mynsiem ïa ki nongkiew ka Jylla lum kiba kwah ban kiew lum ba ki dei ban don ïa ka jingkut jingmut, ka jinglong ryntih, bad ka jingshlur kaba lah ban ïalam ïa ki sha ki sha kliar lum.
Ka jingai khublei ka leit sha u Bah Wallambok Lyngdoh halor kane ka jingjop kaba khraw ka jong u. To ai ba un nangkiew sha ki kyrdan kiba kham shajrong ha ka jingïaid lynti ka jong u bad ban wanrah shuh shuh ïa ka nam bad ka burom ïa ka Jylla.
Lah ban kdew, u lum Bhagirathi II, uba don kumba 6,512 mitar (21,365 phut) na sla duriaw, u dei uwei na ki lum ba itynnad jong ka Garhwal Himalaya ha Uttarakhand. Ka don ha ka Gangotri Glacier, kaba ha ka bynta jong ka wah Bhagirathi, kaba long shi bynta jong ka wah Ganga.
Na ka bynta ki nongkiew lum, ka jingkiew ïa u lum Bhagirathi II ka long kaba kham eh bad kaba shitom. Ka long ka jingtynjuh ïa ka jinglah ban shah naduh ka bor met bad ka bor pyrkhat.
