Shillong, Risaw 13
U Myntri ka tnat Arts and Culture u Bah Sanbor Shullai u la pynthikna ba un rah sha ka Sorkar halor ka jingkyrpad ka Meghalaya Boxing Association (MBA) ban ïoh ïa ka jingmang pisa kaba T. 4 klur na ka bynta ban tei ïa ka shlem ai jinghikai ne ka boxing academy.
Kane ka jingpynpaw u Bah Shullai ka la wan ha ka jingïalang pynkup burom ïa u khlur ïakura barim ka Jylla u Bah Torak Kharpran Sun ha ka sngi Thohdieng jong ka taïew ba la lah. U Bah Torak u la shimti kum u Assistant Coach jong ka kynhun ïakura ka ri ha ka Asian Games, kaba la kut dangshen ha Aichi-Nagoya, Japan, ha kaba ka kynhun ïakura jong ka ri ka la khur lai tylli ki takma skiar bad lai tylli ki takma rnong.
U Bah Sanbor u la pynthikna hakhmat ki nongïalam ka MBA ba un rah ïa kane ka jingtyrwa hakhmat u Myntri Rangbah ka Jylla u Conrad K Sangma bad u la pynpaw ka jingkyrmen ba kane ka jingtyrwa kan sa urlong.
Ha kawei pat ka liang u Technical Director ka MBA u Bah Larry Kharpran u la ong ba ka jingjop u Bah Torak ka la long ka jingsngew sarong ïa ka Jylla bad u la pynpaw ruh ïa ka jingdonkam ban ithuh bad ban kyntiew ïa ki sap jong ki samla ha ka kam ai jinghikai. U la ong ba ka jingnoh synñiang u Torak ka la wanrah burom ïa ka ïing ka sem, ka imlang sahlang bad ka Jylla hi baroh kawei.
Na ka liang u MLA ka Mawlai u Bah Brightstarwell Marbaniang u la pynpaw ïa ka jingdonkam ban kyrshan na ka bynta ban sei ïa ki nongïalehkai ba don sap ka Jylla. U la buh ka jingkylli ruh halor ka jingwanrah ïa ki coach kiba nabar ha ki jingïalehkai bapher bapher, hynrei kam shym la pyndonkam ïa ki coach kiba napoh Jylla.
