Shillong, Risaw 13
U Bransley D. Nongkynrih jong ka Iron House Gym u la rah ïa ka nam lahduh ha ka rynsan pyni dohksah jong ka Sheru Classic NPC Regio -nal North India Championship, da kaba u la jop ha ka Classic Physique bad Bodybuilding, kaba la long ha ka 11 tarik mynta u bnai ha Chandigarh.
Kane ka jingjop ka long uwei pat u mawjam ha ka jingpyni dohksah jong u ban pyni pynurlong ïa ka jingangnud, ka jinglong ryntih bad ka jingkut jingmut jong u.
Lyngba ka jingjop ha kane ka jingïakop, u Bransley un sa leit ïakhun ha ki rynsan ka pyrthei ka ban long ha Kazakhstan ha ka 7 tarik u Naiwieng mynta u snem ha kaba u don ïa ka thong ban ïoh ïa ka IFBB Professional League Pro Card bad ban shim ïa ka sienjam shakhmat na ka bynta ban ïakop ryngkat bad ki bodybuilder ba na kylleng ka pyrthei.
Ka NPC (National Physique Committee) ka dei ka shlem ba ïalam bad btin lynti ïa ki nongïalehkai ba kin lah ban ïakop ha ki rynsan ba kham heh lyngba ka jingithuh na ka jingjop jong ki. Na ka bynta ki bodybuilder ban ïoh ïa ka Pro Card lyngba ka IFBB Professional League ka dei ka jingjop ba khraw tam ka ban plie lad ïa ki ba kin lah ban ïakop ha ki rynsan ba kham heh bad ban ïakop ïa ka Mr. Olympia, kaba la ñiew paidbah kum kawei na ki kyrdan ba paw ha kane ka rynsan pyni dohksah.
Ka jingjop u Bransley ha kine baroh ar tylli ki nam jop ka long ka jingsarong ïa ka Iron House Gym bad ka khyllipmat ba khraw na ka bynta kiwei ki shlem ai jinghikai bodybuilding ha ka Jylla.
