Rung biang ka India sha ka AFC U-17 Women’s Asian Cup naba pynliem ïa ka Malaysia

Shillong, Risaw 13

Ka kynhun ki ‘thei ïalehkai phutbol Under-17 ka India ka la pynliem noh ïa ka Malaysia da 4-0 kol na ka bynta ban wan ha ka kyrdan ba hakhlieh ha ka Group-E bad ka la ïoh rung sha ka AFC U17 Women’s Asian Cup ka ban long ha China ha u snem 2027.

Ha kane ka jingïalehkai kaba lai bad kaba khatduh jong kane ka group, ka India ka la lah ban ïakhun tyngeh naduh kaba sdang ha MP Selayang Stadium kaba ha Selayang, Malaysia myn ha ka sngi U Blei, ha kaba kam shym la ailad ïa ka liang pyrshah ban thep kol watla ka dei ka ri kaba la ïoh pynlong ïa kane ka lympung ïaknieh.

Kumba ka paw ka India hapoh ka jingïalam u Joakim Alexanders -son ka la lah ban thaw ïa ka khana na ka bynta ban long ka kynhun kaba nyngkong eh ban rung biang sha ka Asian Cup ha ka liang ki kynthei, kynthup ïa ka senior.

Ha katei ka jingïakhun ka India ka la ïoh ban thep shi kol ha ka kylla step lyngba ka Redima Devi Chingkhamayum ha ka minit kaba 29. Hadien ba la bteng ïa ka kylla miet ka India ka la thep biang sa lai kol lyngba ka Pritika Barman (51), Anushka Kumari (56) bad ka Nidhi (87) na ka bynta ban khur syndon ïa ka jingjop. Ka ‘thei ïalehkai na Meghalaya, ka Bonifilia Shulai ka la don lang hapoh katei ka kynhun ïalehkai ka ri.

Te kumta ka India ka la long ka kynhun kaba khlem shah rem bad kam shym la shah thep ruh wat tang shi kol ruh ha kane ka lympung. Ïa ka kyrdan ba-ar la ïoh ban bat da ka Malaysia kaba la kamai 6 poiñ, katba ka Syria bad ka Iraq ki la wan ha ka kyrdan balai bad basaw.

Lah ban kdew ha ki jingïalehkai ba kham hashwa, ka India ka la jop haduh 14-0 kol ïa ka Iraq bad da 2-0 kol ïa ka Syria.