Amlarem, Risaw 14
Ka lympung ïalehkai 2nd bad 1st Division Amlarem Football League ba la pynïaid da ka Amlarem Sub Divisional Sports Association (ASSA) ka la nangjam shaphrang ha ka sngi Balang ha Mini Stadium, Lajaplem.
Ha ka jingïalehkai jong ka 2nd Division, ka Pasadwar SSC ka la pynliem da 2-1 kol ïa ka Nongtalang Mission.
Ha ka kylla step ka Pasadwar ka la ïoh ban thep ar kol lyngba u Ridiuos Rymbai (26) bad u Becarefull Amrynsong (36). Hynrei ka Nongtalang ka la lah ban pynphai kylla shi kol ha ka kylla miet lyngba u Jos Tongper (52) hashwa ba kan mad ïa ka jingshah rem.
Ha ka jingïalehkai kaba bud, ka Syndai Lyngkot ka la jop da 3-1 kol ïa ka Amlarem SC.
Tang mar ïasdang ka jingïalehkai ka Syndai Lyngkot ka la pynkhih jar nyngkong lyngba u Dimon Kynda (3), hynrei hadien lai minit ka Amlarem ka la pynïakhaid kylla lyngba u Rivaldo Timung. Hadien katto katne por ka Syndai Lyngkot ka la thep biang sa ar kol lyngba u Ïohphi Chyrmang (40 & 55) na ka bynta ban khur syndon ïa ka jingjop.
Haba phai sha ka jingïalehkai jong ka 1st Division, u Lapynbiang ula khyrwit da ka hat trick na ka bynta ban pynlong ïa ka Thangbuli YSWC ba kan pynjem khnap haduh 7-0 kol ïa ka RL Hawaibhoi.
Ïa katei ka hat-trick u Lapynbiang u la thep ha ka minit kaba 27, 35 & 40), bynrap sa u Tremi (4), Wanpynbha Buam (44), Thymmaibor Buam (72), bad Peace Khyriem (73).
Ha kawei pat ka jingïalehkai, ka Dawki AC ka la pynliem noh ïa ka Pamtbuh SC lyngba ka shi kol ba la thep da u Damanki Manner (68).
