Shillong, Risaw 14
Ka State Sub Junior Boy’s & Girls U-15 Years Boxing Championship ka la sdang ha ka sngi Balang ha Raij Laban College, Madan Laban, ha kaba la wan shim bynta da 7 tylli ki district lem bad 5 tylli ki klob.
Ïa kane ka rynsan ïakura la pynlong da ka Meghalaya Boxing Association (MBA) ha ryngkat ka jingkyrshanlang da ka tnat ïalehkai jong ka Sorkar Jylla.
Haba ai ïa ka jingkren maitphang halor kane ka rynsan ïakura, u Technical Director ka MBA u Bah Larry Kharpran, u la ïathuh ba ki don 54 ngut ki khynnah shynrang bad 17 ngut ki khynnah kynthei kiba la wan shim bynta ha kane ka lympung.
Ïa kane ka jingïakob la plie da u Secretary ka Dorbar Shnong Madan Laban & Riat Laban u Bah R.G Marbaniang bad la sakhi lang da u President ka MBA u Bah Cornilius Kharhunai lem ki dkhot nongkitkam ka MBA, ki nongïalam ka Noble Art Boxing Club bad ba la wan ban ai mynsiem da ki kmie ki kpa bad kumjuh ki khynnah ba ïalehkai lang.
Ha kane ka sngi kaba sdang ki la don 15 tylli ki jingïakhun ba kynthup ïa 11 tylli ki quarterfinal bad saw tylli ki semifinal.
Ki khynnah kiba la khur jingjop ha ka 30-33KG ki long u Daniel Nongrum (BAEKHD), ha ka 40-42kg la jop da u Omega Nongjngi (WJH), Ethan Nongdhar (NBC), Jakrika R Marak (WGH) bad u Banlang Lyngdoh (Ri-Bhoi).
Ha ka kyrdan ïakhun kaba 44-46 kg, ki nongjop ki long u Debraj Thapa (RSBA), Shandor Kharshandi (NBC) bad u Tangrik (EGH)
Katba ha ka kyrdan ïakhun kiba 46-48 kg, ki nongjop ki long u Florian Kharjana (GHBC), u Denzil Myrthong.
Ha ka kyrdan ïakhun kaba 48-50 kg, ka nam jop ka leit sha u Samha-0-Mulieh (WJH)
Haba phai sha ka jingïakhun semi final jong ka kyrdan jingkhia kaba 28-30 kg ki long u Wanmi Kharkongor (USBA) bad Marcilino Rimen (BAEKHD), bad ha ka kyrdan ïakhun kaba 36-38kg ki long U Kitbok Shabong (BAEKHD) bad Elegant Shadap (Ri-Bhoi).
Kane ka jingïakhun kan bteng biang ha ka sngi Palei, ha kaba kin don bun tylli ki kyrdan ïakhun bapher bapher jong ki khynnah shynrang bad kynthei.
