Shillong, Risaw 14
Ka Sikkim dug ka la lah ban pynïakhaid pyrshah ïa ka Meghalaya ha ka jingïakhun kaba saw bad kaba khatduh jong ka Ranji Trophy 2026-27 (plate group) ha ka sngi Balang ha Rangpo, Sikkim.
Haba bteng biang ha ki 44/0, ka 106 ron ban pynlong ïa ka Meghalaya ban bat biang, ka liang pyrshah ka la pynkut da ka 291/7, kaba pynthikna ba ka jingïalehkai kan kut noh da ka jingïakhaid. Ka Meghalaya ka la khur 3 poiñ bad ka Sikkim ka la ïoh 1 poiñ katkum ka jingjop jong ki.
Haba phai dien sha kane ka jingïalehkai, ka Sikkim ka la lah ban kamai 245 ha ka wat kaba nyngkong, hynrei ka Meghalaya ka la lah ban kynjoh 395.
U nongkawang bol ka Meghalaya u Abhishek Kumar u la lah ban pynkhyllem lai ngut ki nongtied kaba pynlong ïa ka Sikkim ban ïoh 67/3. Hynrei u Parth Palawat (66) bad u Gurinder Singh (100 not out) ki la lah ban pynurlong ban kynjoh sha ki 109 hashwa ban shah pynhap ka wiket kaba saw.
U Gurinder, uba la ïalehkai teng na ka bynta ka Meghalaya kum u ‘guest player’, u la long uba kynsai na ka bynta ka Sikkim.
U Ram Gurung, uba la lah ban khur 5/32 ha ka wat kaba nyngkong, u la ïoh biang sa 2/40 ha ka wat kaba ar bad u la ïopdiang ïa ka nam Player of the Match. Te kumta haba kheiñ lang u la ïoh 7/72 ha kane ka lympung. Kumjuh uwei pat u nongtied ba kynsai ka Meghalaya u Jaskirat Singh Sachdeva, u la lah ban khyrwit 127 kaba long ka ‘century’ kaba nyngkong ha ka Ranji, hynnin ka sngi.
Te kumta ka kynhun ïalehkai ka Jylla kan wanphai sha kane ka nongbah ha kaba kan pynkhreh ïa ka jingïakhun pyrshah ïa ka Manipur ha Shillong naduh 18 haduh 21 tarik mynta u bnai.
