Shillong, Risaw 14
Ka lumpung ïalehkai chess ba la tip kum ka “8th East Khasi Hills District Chess Championship 2026” ka la sdang ha ka sngi Balang ha Khasi National Dorbar Hall, Mawkhar Shillong, ha kaba la wan shim bynta da kumba 87 ngut ki nongshim bynta kiba kynthup naduh ki khynnah, ki samla bad wat haduh kiba la rangbah.
Ïa kane ka lympung la pynlong da ka East Khasi Hills District Chess Association (EKHDCA) bad ka jingthmu jong kane ka long ban ban jied ïa ki 12 ngut ki nongïalehkai ba kynsai ki ban mihkhmat ïa ka District sha ka “49th Meghalaya State FIDE Rating Chess Championship 2026” ka ban long ha Nongstoiñ, West Khasi Hills naduh 22 haduh 24 tarik mynta u bnai.
U General Secretary EKHDCA Bah Rijied Katrai haba ïakren bad u nongthoh khubor, u la pynpaw ba ka jingthmu jong kane ka lympung shi bynta ban jied ïa ki 12 ngut ki nongïalehkai ba kynsai ki ban mihkhmat ïa ka District sha ka State Level ka ban sa long ha Nongstoiñ bad na kane ka lympung yn jied pat ïa ki nongïalehkai kiba kynsai ki ban mihkhmat ïa ka Jylla sha ka National Level Tournament ka ban long ha Andhra Pradesh ha u Naiwieng mynta u snem.
