Shillong, Risaw 14
Ka Jylla ka la sei da u rangïalehkai phutbol ba duna ha ka bor ïohi, u Klingson D Marak ban mihkhmat ïa ka ri India sha ka 5th Asian Para Games 2026 ka ban long ha Aichi-Nagoya, Japan.
Kane ka long ka jingkmen kaba khraw ba ka Jylla ka la lah ban sei da u rangïalehkai namar dangshen ha ka Asian Games kaba dangshu dep kam shym la lah ban sei ïa ki nongïalehkai kiba biang pura, lait tang u Assistant Boxing Coach u Bah Torak Kharpran Sun.
Te kumta ha katei ka lympung, ka kynhun ïalehkai phutbol ka India kan sdang ïa ka jingïa-lehkai kaba nyngkong pyrshah ïa ka South Korea ha ka 16 tarik mynta u bnai, ha kaba yn bud sa ka jingïakhun pyrshah ïa ka Japan ha ka 17 tarik, Thailand ha ka 19 tarik, Iran ha ka 20 tarik bad ïa ka China ha ka 21 tarik.
Ha lyndet ka jingshah jied utei u rangïalehkai uba na Garo Hills, ka dei hadien ba ka Megha-laya Blind Football Asso-ciation (MBFA) ka la phah ïa ki nongïalehkai ki ban leit shim bynta ha ka jingpyrshang ha ka nongbah Delhi naduh 25 haduh 28 tarik u Jymmang mynta u snem. Te kumta na ka liang ka Indian Blind Football Federation ka la pyllait ïa ka thup kyrteng jong ki nongïalehkai ka Jylla, kiba kynthup ïa u Klingson, Prakash D Shira, Johnborlang Pyng-rope lem bad u rangapkol u Visiondo M Sangma.
Hynrei tang u Klingson uba la shah kynthup hapoh ka kynhun ïalehkai ka ri, kiba la mih ha ka 12 tarik mynta u bnai ban leit sha Japan.
Lah ban kdew u Klingson u la long borabor kum u rangïalehkai ka India ha ki hynriew snem ba la lah. Dangshen u la ïoh ban leit sha Japan ban shim bynta ha ka IBSA Men’s Blind Football Championship ha u Ïaïong ha kaba ka India ka la wan ka kyrdan basaw hadien ba ka la jop ïa ka Australia bad ka Uzbekistan.
Shuh shuh u la mih-khmat ruh ïa ka Jylla ha ki lympung ïalehkai kiba la long ha ka thaiñ shatei lam mihngi bad ki lympung ïalehkai (national). Ha u Naitung, ka Jylla ka la khur jingjop ha ka 7th Men’s Northeast Zonal Blind Football Champion-ship. Kumjuh ka kynhun jong u, ka Meghalaya Chalang ka la wan ha ka kyrdan ba-ar ha ka 2nd Indian Blind Football Premier League kaba la long ha u Naitung mynta u snem.
