Shillong, Risaw 14
Ka Meghalaya Police Football Team ka la pynkyndit ïa u paidbah riew ieid phutbol hadien ba ka la pynliem noh ïa ka Langsning FC lyngba ka tie-breaker da 5-4 kol ha ka jingïalehkai ‘playoff’ kaba ar jong ka SSA Super Cup ha ka sngi Balang ha SSA Stadium, Polo.
Kane ka jingjam shaduh ka tie-breaker ka la wan hadien ba kine ki kynhun ki la ïakhaid mar 1-1 kol. Ka Langsning FC ka la pynkhih jar nyngkong lyngba u Wadajied Kynsai Ryngkhlem ha ka minit ba 17, hynrei ka MLP ka la lah ban pynphai kylla ha ka kylla miet lyngba u Rapborlang Marweiñ (67).
Haduh kaba kut ki 90 minit bad ka 30 minit ba la pynjlan ïa ka ‘extra time’, kitei ki kynhun kim shym lah shuh ban thep kol. Haba la rah sha ka tie-breaker ha ki lai sien shut kiba sdang, ki ar kynhun ki la ïoh ban pynkhih ïa ka jar.
Hadien kane u Chesterfield Nongdhar ka MLP ha ka jingwan shut ka jong u daiñ ka bol ka la dei beit ïa ka diengkol, katba u Donlad Diengdoh ha shut ïa ka bol ka la her beit shalor. Hadien kane, ka MLP ka la lah ba kan pynkhih pat arsien ïa ka jar, katba ka Langsning RFC ka la lah satang kawei, bad ha ka sien shut ba hynriew, u Mangkara Sun ka Langsning FC u la tur shakhmat, kaba hangne marsien ïa shut u rangapkol ka MLP u Eveningstar Bareh u la lah ban kyrda ïa ka bad ban pynlong ba kan khur syndon ïa ka jingjop.
Da kumta, ka Super Cup mynta ka samoi, lah ban ong ba ka la sei shisha ïa ki artylli ki jingïakhun kiba itynnad bad biang bor bha jong baroh artylli ki playoff, namar ha ka sngi Ba-ar ka Nongkseh SSCC ka la pynliem ïa ka Sawmer da 4-2 kol.
Kumta da kane ka jingjop, kaba sah mynta ïa ka MLP ba kan phai khmat na ka bynta ban ïakhun pyrshah ïa ka Shillong Lajong FC ha ka semi final ka ban long la sngi Saitjaiñ.
