Rymphang, February 2023:
Da ki bun bun snem, la ngeit ba ka koit ka khiah jong ki bniat kam don jingktah ia ka koit ka khiah kyllum hynrei kane ka jingiapyrkhat mynta ka don ia ki jingbatai kiba thymmai. Ka jingwadbiah ka la pyni ba ka koit ka khiah ka bym biang hapoh shyntur ka lah ban nohsynñiang sha ki katto katne ki jingshitom ha u klongsnam kum ka infective endocarditis, ki jingshitom ha ki tor bad shibun kiwei pat ki jingeh. Ka don shibun bha ka jingpynshisha ia ka jingdon jingiadei beit beit hapdeng ka diabetes bad ki jingpang dohbniat bad ba kine baroh ar ki don jingktah kawei ia kawei. Ka jingbymsumar khuid ia ka shyntur ka lah ban wanrah ia ka jingbam khñiang ki bniat, ki infection bad kiwei kiwei kiba hadien ki ktah ia ka jingim kaba man ka sngi bad ia ka jinglong jingim.
Ban sumar bha ia ka koit ka khiah hapoh shyntur ka iarap ban pynlait na ki infection bad kumta nohsynñiang sha ka rukom im kaba kham longkoit longkhiah. Ka met jong ngi ka don ia ki mechanism kiba iararp ban pynithuh ia ngi ia ka koit ka khiah jong ki bynta jong ka met jong ngi. Kum ka nuksa, ka jinglieh jong ki bniat, ki dohbniat kiba pink bad kiba i koit i khiah khlem phlei snam haba tyrsuh, ka shyntur ka bym sma kynjing bad ka jingbymshah ktah ki bniat na ki jingkhluit ne jingpjah, kine baroh ki dei ki dak ki shin jong ka shyntur kaba koit ba khiah bad ka jinglehkhuid kaba biang ia ka shyntur.
Katto katne ki jingai jingmut kiba donkam ban pynneh ia ka koit ka khiah ha shyntur ki long kine harum:
1. Leit sha ki doktor bniat man ka 6-8 bnai bad bteng ka jingleit sha ki.
2. pynduna ka jingbam ia ki jingbam bad ki jingdih kiba thiang palat bad pynneh ia ka bam kaba longkoit longkhiah. Shut bad tyrsuh pynkhuid ia ki bniat la kumno kumno ar sien shi sngi bad wat klet ban pynkhuid ia u thylliej.
3. Ka jingpyndonkam da ki brut kiba jem bad ki toothpaste kiba don ia ka fluoride kidei kiba iarap bha haba pynkhuid ia ki bniat bad pynlait na ka jingbam khniang ki bniat. Bujli ia ki brut shut bniat man ki lai bnai.
4. Ka long kaba donkam ban kynmaw ba ka jingpyndonkam bun palat ia ka toothpaste kan nym pynkhuid ia ka shyntur jong phi khambha, tang kat u shyieng motor ka toothpaste ka la biang.
5. Kynruh ia ka shyntur man ba dep bam. Wat shah ba kiba sah na ki jingbam kin neh slem ha ki bniat jong phi namar ba ki long kum ka jaka im ki bacteria ha ka shyntur jong phi kaba hadien ka pynmih ia ka acid kaba nohsynñiang sha ka jingpyut jong ki bniat.
6. Kiar ka pyndonkam ia u duma la kadei ha ka dur u sirket ne u duma bam.
7. Wat ju pyndei da ki tiar ba nep ia ki dohbniat ne ki bniat bad shaniah tang ha ki nongsumar lada phi donkam ia kano ka jingphah leh na ka bynta ki bniat wat la kadei ka jingpynkhuid ne ka scaling.
8. Ka bam kaba longkoit longkhiah kadei kaba donkam na ka bynta ka jingkhuid jong ki bniat. Kham jied ia ki soh bad ki jhur kiba hap ban shu ktah thrup thrup namar ba kim ieh ia kiba sah ha ki bniat bad ktha bha ruh ia ka jingbam jong phi.
9. Lah ruh ban pyndonkam ia ki mouthwash ban weng ki jingbam kiba sah na shyntur.
10. Ka long kaba donkam ruh ban sngewthuh ia ki jaid jingshut bniat kiba phi thied bad pule bha ia ki jingthoh ha ka jingsop shwa ban rai ban thied.
