Bertina Lyngdoh, Rymphang:
Ka apot sepsngi te ka lap ia ki, naba kim shim la tip lypa ia ka lanot kaba ap ia ki. Kum ki briew, ngim ju lah ban tip lypa ia ka sngewbha ne ka sngewsih. Ym don ba lah ban tip lypa ba lano ka sngewbha ne sngewsih kan lap la ha kano ka por, ka kynta, ka minit, ne ka khyllipmat. Kumjuh ruh, ngim lah ban tip lypa, ia ki jingkylla kiba long pynban ki jingsngewsih ia ka shong-suk shongsain ka imlang sahlang. Mynta ngi rkhie, shibit pat ngi ïam, mynta ngi khawai, sa shiphang shibit ka jingpang ka ban, lada kat kito ki sngi ki long ki sngi ka jingioh-thiah suk, kynsan kyndit ka lashai bad kumta terter ki sngi, ym suk shuh ka thiah ka dem, dang shiphang ngi bam pahuh, suki-pa-suki pat ka thylli noh ka pla, bad kumta ter ter kiba bun ia kiba ngim lah ban tip lypa ba kin wan lyngshop ha ngi. Kane kein ka dei kata ka bor Blei ia kaba ym don pat da kawei ka bor kaba lah ban leh pyrshah ia ka bor u nongbuh nongthaw.
Ha ka pyrthei, don ka synshar Blei, lem ruh ka synshar u soitan. Lada ka bor u soitan ka iai skhem bad neh slem ha ki mynsiem briew kumta, ka jingjaijai bad jemnud u nongthaw ka iai bitar la kan slem te, hynrei ia kaba u briew pat un ym lah ban pdiang ne mutdur ia ka apot kaba la ban bad lap ia ki. Namarkata, ka jingngat ki briew ha ka shrip ka apot ka pynkylli iangi ba kaei kane, bad balei ka wan jia. Lehse, ka apot sep-sngi kaba la ban bad wan rah shibun ki jingkhuslai ki lah ban long namar ka jingbym tieng burom shuh jong ngi ia u nongthaw, ka jingbym don shuh kata ka jingiatip lem, jingsngewthuhlem, bad jingsngewsynei lem para briew, ka jingpynshitom ia ki mynsiem briew ha kiba bun rukom, ka jingleh pyrshah ia ka mon u Kynrad bad kiwei kiwei kiba long ba kum ki briew ngi hap mad ia ka apot. Haba la thoh hi la ka sngi ka ia, ka por ka kynta ia kaba ka apot kan sa jia, ngim lah kein ban iaid lait na kita. Kum ka apot ka Turkey bad Syria ki la mad. Ka por ka jingsngewsih, ka jingïam briew, ka jingduh noh ia ki baieit bathoin ki mynsiem, ka jingjulor ka pyrthei mariang, ka jingduh noh ia ka spah ka phew, ka la ktah shibun ia kine ki artylli ki ri. Ka long kaba sangsot bha, haba ngi iohi ne sngew ia ka jingiam khamtam u rangli u juki, namar ki la duh noh ia ia kat kaba ki don. Ha kum kane ka apot, uba iap ruh u bun, bad uba iasait na ka bynta ka jingim ruh u ba bun. Shano kin leit shano kin wan, da kumno kin koit na ki jingmong bad haei ka jaka riehtngen jong ki khamtam ia kito kiba u blei u dang ibit ban im. Katno ka long kaba sngewsih ba dang don kiba dang iasait la ka jingim, ki khih ki ksar, ki iam ki lynniar, ia ki jingpang jingmong ia kaba la wan lyngshop haki kum ka jinglyngshop u Khynniuh ha ka jingbym poi pyrkhat. Uba iap u la nang bun, uba iasait ban im ruh u bun, katba ki lad jingiarap ne pyllaitim kim da long kiba kotbor namar ka jingjulor ka long kaba bun bha.
Kumta, sa tang ki jingsngewlem lym ruh ka jingdwai na kylleng satlak ka pyrthei ia kito kiba la ngat ha kum kane ka apot. Kane kein ka dei ka por ba ngi wad jingsuk ba haei ka don. Kumta, to ngin tieng burom i’u Blei bad khamtam ia ka jingdon jong u. Kynmaw ba u Blei u lah ban tynjuh iangi da kiba bun rukom, bad u lah ruh ban wan paw hangi ha ki dur paw kiba pher. To ki jingdwai kin iai sah ia kito kiba mad ia kum kane ka apot, bad to u Blei ba ha ka jingibit jong u un pynim bad pynkhiah ia kiba ula mang ba kin im bad ban shakri ia u.
