Ranchi, Rymphang:
U nongïalam ba pawkhmat jong ka seng BJP na Tamil Nadu u C P Radhakrishnan ha ka sngi Saitjaiñ u la bam smai ba un shimti ïa ka kam kum u Lat uba 11 jong ka Jharkhand ha Raj Bhavan kaba ha Jharkhand.
U Acting Chief Justice jong ka Jharkhand High Court u Aparesh Kumar Singh u la pynbam smai ïa u Radhakrishnan, 65, ha ka jingïakynduhlang ba la don ryngkat ruh u Myntri Rangbah jong ka jylla u Hemant Soren, ki Myntri ka sorkar kmie, ki MP bad ki MLA. U Radhakrishnan, u la long u dkhot jong ka Lok Sabha la ar sien na Coimbatore, bad mynta u la shimti ïa ka kam na u Ramesh Bais, uba la long u Lat jong ka Jharkhand naduh u Naitung jong u snem 2021.
