Shillong, Rymphang 20:
U Gaurav Gogoi uba dei u MP ka Lok Sabha na ka Indian National Congress (INC) u la ong ba lada ka Congress ka wan ha ka bor synshar, u Bah Vincent H Pala un long kum u Myntri Rangbah ka Meghalaya.
Haba kren sha ki lad pathai khubor, u Gogoi u la ong u Bah Vincent H Pala uba dei u President ka Meghalaya Pradesh Congress Committee (MPCC) bad uba dei u MP ka Lok Sabha, u la ïakhun shisha na ka bynta ka bit ka biang ki paidbah ka jylla Meghalaya. Haba ka don ka jingthombor ïa ki riewngeit Khristan ruh ha kylleng ka ri, u ju rah ïa kane ka mat ban ïakren hapoh ka Parliament bad u la kren shibun kiei kiei na bynta ki rit paid bad ban wanrah ïa ka roi ka par hapoh ka konstitwensi jong u.
U la ong ba ka Congress ka la dep rai ruh ba u Bah Pala un long kum u Myntri Rangbah ka jylla lada ka Congress ka wan ha ka bor bad un long u Myntri Rangbah ka jylla u ban noh shibun ka jingieid ïa ki paidbah ka jylla.
“Nga la dep ïohi ïa u Bah Vincent Pala hapoh Parliament bad nga la dep ïohi kumno u ïakhun na ka bynta ka bit ka biang ka jylla Meghalaya bad man ka por ba don ka jingshah thombor jong ki riewngeit Khristan ha ki snem kiba la dep hapoh ka jingsynshar jong ka sorkar u Narendra Modi. U la kren shaphang ki rit paid bad u la krem ruh shaphang ban wanrah ka roi ka par. Nga la ïohi ba kum u MP kumno u don ka jingkitkhlieh ban kren bad wanrah ïa ka jingkiew hapoh ka konstitwensi ka jong u. Nga la dep ban ong ïa ka konstitwensi jong u ba phi long ki paidbah kiba donbok bad lada phi ïoh ïa u kum u Myntri Rangbah lei un dang the shibun ka jingieid namar kum u MP u hap ban phiah noh ïa ka jingieid jong u ha ki 36 tylli ki konstitwensi bad lada u long kum u Myntri Rangbah un sa theh kham bun,” la ong u Gogoi.
Ha kawei pat ka liang, u Gogoi u la ong ba u artatien ba ka Bharatiya Janata Party (BJP) kan ïoh biang ïa ka jingjop na ki artylli ki konstitwensi hapoh ka jylla ha kane ka ilekshon ka ban sa long shen.
U Gogoi u la ong ba ka long kaba artatien ba ki arngut ki nongmihkhmat ka seng BJP, kita u Bah Alexander Laloo Hek uba dei u nongmihkhmat ka Pynthorumkhrah Constituency bad u Bah Sanbor Shullai uba dei u nongmihkhmat ka South Shillong Constituency, ba kin wan phai biang sha ka jingjop ha kane ka ilekshon MLA ka ban sa long ha ka 27 tarik u Rymphang 2023.
U la ong ba lada ka seng BJP ka wan ha ka bor hapoh ka jylla, u Myntri Rangbah ka jylla un nym shong ha nongbah Shillong bad ka kyrteng jong u kan long tang kum ka nam, hynrei ïa baroh ki jingshim rai yn shim na Dispur, Assam.
“Lada ka BJP ka wan ha ka bor, u Myntri Rangbah ka jylla un nym shong ha nongbah Shillong. U lah ban don tang ka nam, hynrei ïa ki jingshim rai baroh yn shim na Dispur bad kata ka dei kaei kaei kaba ngi hap ban kiar na ka bynta ka jingmyntoi bad ka jingsuk jong ki paidbah ka jylla Meghalaya bad ba ïa kam saiñ hima sima jong ka jylla, yn dei ban shim rai hi da ki paidbah ka jylla Meghalaya,” la ong u Gogoi.
