Shillong Rymphang 21:
Ka sngi ban leit ontep donburom ïa ka met u Myntri barim ka Sorkar, u Bah HDR Lyngdoh la pynkylla noh na ka 24 tarik sha ka 23 tarik mynta u bnai.
Kane ka long katkum ka jingpyntip kaba la phah hadien ba la shong pyrkhat kam kyrkieh ka Executive Committee ka UDP Sohïong Circle ha kaba la don ka jingpynkylla haba ïadei bad ka sngi ontep katkum ka jingbthah na ka liang ka ïing ka sem ryngkat bad ka UDP Sohïong Circle.
La ïathuh ba ka sngi ontep ka dei ha ka 23/02/2023 ha ka por 11 baje mynstep ha kaba la kyrpad ban pyntip lem sha baroh khnang ba ka kam kan bit kan biang.
U Bah HDR uba ju khot ieid da u Maheh, u la mih ban ïakhun biang ha kane ka ilekshon na Sohïong konstitwensi kum u kyrtong ka UDP.
U Bah HDR, uba la long u MLA ka Sohïong konstitwensi na ka seng HSPDP ha u snem 1988, bad kham bun snem na ka seng Congress, u la khlad kyndit ha ka janmiet ka Lah Sngi U Blei ha Bethany Hospital namar ka jingkem pang kynsan.
Ïa ka jingthep vote ha Sohïong konstitwensi la hap ban pynsangeh noh shwa, hynrei ka jingthep vote kan ïaid beit ha ki 59 tylli ki konstitwensi ha ka 27 tarik mynta u bnai.
Ha kawei pat ka liang, u kyrtong ka Congress u Bah Osborn S Kharjana, u la phah ka khubor lem sngewlem sha ka ïing ka sem bad ki khun ki kti u Bah HDR bad duwai ruh na ka bynta ka jingjahthait ka mynsiem une u nongïalam uba la khlad noh.
U Bah Kharjana, u la ïathuh ruh ba na ka liang jong u, u la pynsangeh lut ïa baroh ki kam kiba ïadei bad ka ilekshon ha Sohïong ïa mynta tad haduh ban da dep ban leit ontep ïa u Maheh HDR Lyngdoh.
