Agartala, Rymphang:
Ki bor sorkar jong ka jylla Tripura ha ka Lah Sngi U Blei mynta ka taiew ki la ïathuh ba ki bor pulit jong ka jylla ki la leit ban kem noh ïa uwei u nongïalam Panchayat na ka shnong Dwarikapur, Khowai district na ka daw jong ka jingdonkti jong u ha ka jingjia shah pynïap jong uwei u nongïalam jong ka seng CPI-M. U nongïalam Panchayat u ba la shah kem ha ka miet jong ka Sngi U Blei ba la dep u dei u ba la tip kyrteng kum u Krishna Kamal Das (48 snem ka rta) u ba la donkti ha ka jingjia shah pynïap jong u nongïalam ka CPI-M u ba la tip kyrteng kum u Dilip Shukla Das (50 snem ka rta).
Halor katei ka jingjia, watla na ka liang ki bor pulit ki la kam ba katei ka jingjia ka la jia na ka daw jong ka jingïashun ba shimet bad ym dei na ka daw jong ki kam saiñ hima, pynban na ka liang ki nongïalam jong ka CPI-M lem bad ka Congress ki la kynnoh ba u Dilip u la shah pynïap na ka daw jong ka jingdonkti jong ki nongïalam ka BJP ban kynshoit bad pynshlur ïa ki nongkyrshan jong ka BJP ban thombor ïa ki nongkyrshan jong kiwei kiwei pat ki seng saiñ pyrthei.
Kat kum ka jingïathuh jong ki bor pulit ka jylla, ki la pyntip ba u Dilip u la leit ban thombor shwa ïa ka ïing sah jong u Krishna ha ryngkat ka jingkynnoh ba dei ba u uba la kyntait ban ai jingïarap ïa u na ka bynta ka skhim PMAY bad kumjuh ruh halor kiwei kiwei ki lad jingïarap kiba ka sorkar ka pynbiang.
Katei ka jingïakajia hapdeng kitei ki 2 ngut ka la sdang ka miet jong ka Sngi Saitjaiñ ba la dep – 2 sngi hadien ka jingpynlong ïa ka ilekshon sha ka Ïing Dorbar Thaw Aiñ jong ka jylla Tripura. Na katei ka jingïakajia la ïathuh ba u Dillip u la ïoh ïa ka jingmynsaw kaba jur hadien ka jingshah thombor ha u Krishna bad ha u nongñiah kali jong u uba la tip kyrteng kum u Tapas Das.
U Dilip u la khlad noh ha ka Sngi U Blei ba la dep hadien ba la leit ban rah sumar ïa u sha Agartala Government Medical College.
Tad haduh ba la ïoh ïa kane ka khubor, la ïathuh ba na ka liang u nongñiah kali jong u Krishna Kamal u dang don hapdeng ka jingphet rieh bad ki bor pulit ki la sdang ban pynlong ïa ka jingleit thwet khnang ban ïoh kem noh ïa u.
