Imphal, Rymphang:
Ka nongmihkhmat barim jong ka sorkar Madhya Pradesh kaba dei ruh ka Lat barim jong ka jylla Chhattisgarh, ka Sushri Anusuiya Uikey kaba dang shen ka la shah pynkhamti ha ka President jong ka ri India – Droupadi Murmu ban shimti ïa ka kam kum ka Lat jong ka jylla Manipur, ha ka 22 tarik mynta u bnai ka la bam smai ban shimti ïa ka shuki ha ka jingïalang bam smai kaba la pynlong ha Raj Bhavan, Imphal.
Ha katei ka sngi ïa ka Sushri la pynbam smai da u Justice MV Muralidaran u ba dei u acting chief justice jong ka Manipur High Court.
Ka Sushri Uikey, kaba dei mynta ka Lat ba 18 jong ka jylla Manipur ka la mih bujli ïa u La Ganesa ban shimti ïa katei ka shuki Lat jong ka jylla.
Ha ka jingïalang bam smai kaba la pynlong ha katei ka sngi, la wan ban ïashim bynta lem ruh da u Myntri Rangbah ka jylla – N Biren Singh, u Lamphang ka Ïing Dorbar Thaw Aiñ jong ka jylla Manipur – Thokchom Satyabrata Singh, ki dkhot ka Kynhun Myntri, u Chief Secretary, ki heh pulit bad kiwie kiwei ki heh sorkar jong ka jylla. Ha ka jingwan ïuh kjat jong ka Sushri ha ka sngi Ba-ar mynta ka taiew la pdiang burom ha ryngkat ka ‘guard of honour’ ba la pynkhreh da ki pulit bad bor pahara jong ka jylla.
Ka Sushri Anusuiya Uikey hashwa ba kan shimti ïa ka shuki kum ka Lat jong ka jylla Manipur ka la dei shwa ka Lat jong ka jylla Chhattisgarh naduh ka 16 tarik u Nairung, 2019 tad haduh ka 12 tarik u Rymphang, 2022.
