Dibrugarh, Rymphang:
Ki bor sorkar jong ka jylla Assam ha ka Sngi Balang mynta ka taïew ki la pyntip ba uwei u dkhot jong ka seng kieng atiar ULFA-I u la wan ban pyndemwait noh ïalade hakhmat ki bor pulit jong ka thaiñ Dibrugarh district. U dkhot ka ULFA-I u ba la wan ban pyndemwait ïalade ha katei ka sngi u dei u ba la tip kyrteng kum u Bikramjit Chetia ïa u ba la ju tip ruh da ka kyrteng sin kum u Bikram Gogoi bad u Ranjit Asom.
Kat kum ka jingïathuh jong ki bor pulit ka jylla ki la pyntip ba u Bikram u la wan ban pyndemwait noh ïalade hadien ka jingïoh ïa ka lad ban phet jyndat na kawei ka ktem trei kam jong ka seng ULFA-I kaba don ha Myanmar.
Ïa u Bikram la leit ban shimti da ki bor pulit ka Chabua PS na kawei ka thaiñ khappud kaba don hapdeng ka jylla Assam bad Arunachal Pradesh ha Tinsukia district. Na ka liang ki bor pulit ki la pyntip ba u Bikram u dei u nongshong shnong ka thaiñ Chabua, Dibrugarh district jong ka jylla Assam. Ki la pyntip ruh ba u Bikram u la leit ban pynïasoh ïalade bad ka ULFA-I ha u snem 2019. Halor katei ka jingjia, na ka liang u SP ka Dibrugarh District – Shwetank Mishra u la ïathuh ba na ka liang ka tnat pulit kam pat shym la tip satia ïa ki daw ba balei u Bikram u la ieh noh ïa ka ULFA-I. u la ïathuh shuh shuh ba na ka liang ki bor pulit ki la sdang ruh ban pynlong ïa ki jingtohkit pyrshah ïa u.
