Guwahati, Rymphang:
Ka Ïïng Kashari ba kyrpang jong ka National Investigation Agency (NIA) na nongbah Guwahati ha ka sngi Palei ba la dep sa shisien ka la khyllie biang ïa ka mokotduma pyrshah ïa u MLA ka jylla Assam, u Akhil Gogoi kaba ïadei bad ka jingïakhih pyrshah ïa ka Citizen Amendment Act (CAA) ha ka jylla Assam kaba la jia ha u snem 2020.
Kat kum ki jingïoh lum jingtip la ïathuh ba na ka liang ka NIA ka la khllie biang ïa katei ka mokotduma pyrshah ïa u Akhil Gogoi hadien ka jingïoh hukum na ka Gauhati High Court.
Ha kawei ka liang la ïathuh pat ba na ka liang ka Supreme Court ka la dep ban mynjur ban pynbiang ïa ki lad jingïada na ka bynta u Akhil Gogoi ba un lait na ki jingshah kem tad haduh ka 24 tarik mynta u bnai. Halor katei ka jingmynjur jong ka Supreme Court, na ka liang u nongïasaid aiñ jong ka NIA – Pranjal Das u la pynkylla ïa ka tarik na ka bynta ka ‘hearing’ tad haduh ka 28 tarik mynta u bnai.
Dei ha ka 9 tarik u Rymphang ba ka Gauhati High Court ka la ailad ïa ka NIA ban pynrung mokotduma pyrshah ïa u Akhil Gogoi bad ïa 3 ngut kiwei pat kiba la ïa donkti lang ha katei ka jingïakhih pyrshah ïa ka CAA ha Assam. Ki 3 ngut kiwei pat kiba la shah pynrung mokotduma ki kynthup ïa u Dhaijya Konwar, Bittu Sonowal bad u Manash Konwar.
