Kohima, Rymphang:
U Myntri Rangbah barim jong ka jylla Nagaland u ba dei ruh u nongïalam jong ka seng Naga People’s Front (NPF), u Shurhozelie Liezietsu ha ki khyndiat sngi kiba la leit noh u la pyntip ba ka kyrdop ban ïalang paralok bad kiwei kiwei ki seng saiñ pyrthei ha ka ilekshon ka dang plie, hynrei na ka liang ka seng kam pat shym la rai bad kano ka seng saiñ pyrthei ba kan ai jingkyrshan.
Haba ïakren bad ki lad pathai khubor na ka liang u Liezietus u la ïathuh ba kane ka ilekshonÏing Dorbar Thaw Aiñ kaba mynta ka long kaba kham kyrpang. U la ïathuh ba ha ki por kiba la leit noh ki ju don tang kumba 3 ne 4 tylli ki seng saiñ pyrthei kiba ju ïakhun ïa ka ilekshon, hynrei ha kane ka kynti kaba mynta ki don haduh 12 tylli ki seng saiñ pyrthei. Hynrei u la ïathuh pat ba ha kane ka ilekshon kaba mynta tang ka NPF ka dei ka seng riewlum bad kiwei kiwei pat ki dei ki ‘national party’.
Halor ka mat kaba ïadei bad ka jingïalang paralok hapdeng ka BJP bad ka NDPP, na ka liang u Liesietus u la ong ba ka ka jingïadei hapdeng kitei ki 2 tylli ki seng ka long kaba kham kyllaiñ namar baroh 2 tylli ki seng ki la kob ba kin ïoh ban thaw ïa ka sorkar tang marwei khlem da synrop lang bad kiwei kiwei ki seng saiñ pyrthei. U la ong ruh ba katei kan nym lah ban urlong satia.
Ha ka jingïakren bad ki lad pathai khubor u la ong shuh shuh ba ha kane ka ilekshon kaba mynta ka NPF ka la ïakynduh ïa katto katne tylli ki jingeh bad dei na katei ka daw ka la pynïakhun tang ïa 22 ngut ki kyrtong. U la ïathuh ruh ba ha kane ka ilekshon kaba mynta, ka NPF ka don ïa ka jingkyrmen ban ïoh rah ïa ka nam jop na ki 12 lane 15 tylli ki thaiñ.
Shuh shuh halor ka mat kaba ïadei bad ka jingkren jong u Myntri ka Tnat Kam Pohïing jong ka Sorkar Pdeng – Amit Shah u ba la ong ba ïa ka Armed Forces Special Powers Act (AFSPA) yn sa lah ban weng noh na ka jylla ha ki 3 ne 4 snem ki ban sa wan, na ka liang u Liezietus u la ong ba ka jinglong jingman ha ka jylla Nagaland mynta ka la sdang ban bha bad ha ki 6 snem kiba la leit noh kim shym la don satia kino kino ki jingjia kiba la wanrah ïa ka jingsynjor ha ka shong suk shong saiñ jong ka jylla.
Nalor kiwei kiwei ki mat, u Liezietus u la ong shuh shuh ba ka thong ba hakhmat eh jong ka NPF ka long ban wanrah ïa ka sorkar kaba lait na ki kam bam sap, bad ban wanrah ïa ka sorkar kaba lah ban ai ïa ka jingsynshar kabab ha tam na ka bynta ki paidbah nongshong shnong jong ka jylla. U la ong shuh shuh ba ka NPF ka dei tang ma ka kawei na ki seng saiñ pyrthei kaba ïeng skhem halor ka nongrim kaba dei na ka bynta ka bha ka miat jong ki paid Naga.
Ïa ka ilekshon Ïing Dorbar Thaw Aiñ jong ka jylla la buh ban pynlong ha ka 27 tarik mynta u bnai (mynta ka sngi).
