Kokrajhar, Rymphang:
Ki bor sorkar jong ka jylla Assam ha ka 24 tarik mynta u bnai ki la pyntip ba haduh 115 ngut ki nongshong shnong ka jylla ki la shah kem na ka thaiñ Kokrajhar District na ka daw jong ka jingdonkti jong ki ha ki kam shong kurim ïa ki khynnah rit.
Kat kum ka jingïoh lum khubor la ïathuh ba na ka liang ki bor pulit ka thaiñ Kokrajhar ki la shimkhia halor ki mokotduma kiba ïadei bad ki kam shong kurim ïa ki khynnah rit bad ki la ïoh ban kem ïa kitei ki 115 ngut na ki thaiñ bapher bapher jong ka distrik.
Kat kum ka kyrwoh la ïathuh ba ïa ki 17 ngut la ïoh ban kem na ki thaiñ kiba hap hapoh ka jingkhmih jong ki bor pulit ka Kokrajhar PS, 44 ngut na ki thaiñ kiba hap hapoh ka jingkhmih jong ki bor pulit ka Gossaigaon PS, 5 ngut na ki thaiñ hapoh Dotma PS, 10 ngut na ki thaiñ ba hapoh ka Kachugaon PS, 9 ngut na ki thaiñ ba hapoh ka Kazigaon, 14 ngut na ki thaiñ ba hapoh ka Fakiragram PS, 10 ngut na ki thaiñ ba hapoh ka Bagribari PS bad 6 ngut pat na ki thaiñ ba hapoh ka jingkhmih jong ki bor pulit ka Serfanguri PS.
Kat kum ki jingïoh lum khubor la ïathuh ba ha ka thaiñ Kokrajhar district, ki bor pulit jong ka thaiñ ki la ïoh ban pynrung ïa haduh 204 tylli ki mokotduma kiba ïadei bad ki kam shong kurim beaiñ ïa ki khynnah rit.
