Shillong, Rymphang:
U Dr. Nitin Sahai, Assistant Professor jong ka Department of Biomedical Engineering ka skulbah North-Eastern Hill University (NEHU), Shillong ha ki khyndiat sngi kiba la dep u la ïoh ïa ka khusnam “Long Term ICMR-DHR International Fellowship for Young Indian Biomedical Scientists 2022-23”. Na katei ka khusnam, u Dr. Sahai un ïoh ïa ka lad ban leit jngoh ïa ka Department of Public Health Medicine, Medical School, University of Pecs, Hungary na ka bynta shi snem.
U Dr. Sahai u dei uwei napdeng ki 27 ngut ki kyrtong na ka ri India uba bad u dei tang ma u marwei na ka Thaiñ Shatei Lam Mihngi jong ka ri u ban ïoh ïa katei ka khusnam. U la ïoh ïa katei ka khusnam na ka jinglah jong u ban noh synniang bad pynjanai ïa ki kam ki jong u ha ka sobjek kaba ïadei bad ka ‘Biomedical Engineering’. Halor katei ka khusnam, na ka liang ka skulbah NEHU ka la pynpaw ïa ka jingsarong kaba khraw ba u Dr. Sahai u la ïoh rah ïa katei ka khusnam – ha kaba ka jingleit jngoh jong u ïa ka University of Pecs, Hungary kan lah shuh shuh ban pynjanai ïa ki lad jingtip jingnang jong u ha ka laiñ pule ‘biomedical engineering’.
Ïa katei ka ‘fellowship’ la bei tyngka da ka Indian Council of Medical Research bad da ka Department jong ka Health Research (DHR), Sorkar India.
Ki lad wadbniah jong u Dr. Sahai lyngba katei ka ‘fellowship’ ka long halor ka mat ba ïadei bad ka ‘3D printing’ – ka lad trei kam teknoloji kaba thymmai ban saiñdur ïa ki ‘orthotics’, ‘prosthetics’ bad kiwei kiwei. Un ïoh ïa ki lad jinghikai halor ki kor teknoloji kiba kat kum kane ka juk stad kaba mynta kum ha ka liang ka ‘3D printing’, ‘3D design’, ‘prototype production’, ‘3D scanning’ bad kiwei kiwei. U Dr. Sahai u la don ha ka skulbah NEHU la kumba 10 snem eiei bad u la lah ruh ban pynlong ïa bun tylli ki ‘workshops/seminars’ bad pynmih paidbah ruh ïa bun tylli ki ‘journal’ halor ki mat kiba ïadei bad ka ‘3D printing’ ha ka liang ka lad sumar sukher.
