Imphal, Rymphang:
Ki bor sorkar jong ka jylla Manipur ha ka Lah Sngi U Blei mynta ka taiew ki la pyntip ba ki bor pahara ka jylla ki la ïoh ban kem ïa uwei u ehrang jong ka seng kieng atiar Kangleipak Communist Party (KCP) u ba ju donkti ha bun tylli ki kam dawa pisa beaiñ ha kylleng ka jylla. Kat kum ka jingïoh lum jingtip la ïathuh ba na ka met jong utei u ehrang, ki bor pahara ki la ïoh ruh ban kurup ïa kawei ka 9 mm pistol, kawei ka ‘magazine’ bad 3 tylli ki kuli 9mm. la ïoh ban kem ïa u na kawei ka jaka rieh tngen kaba don ha ka thaiñ Kakching district, Manipur. Kat kum kyrwoh ba la pyllait da ki bor pahara ki la pyntip ba ïa utei u ehrang la ïoh ban kem hadien ba ki bor pulit jong ka jylla ha ryngkat ka jingïatreilang bad ki bor shipai ka Assam Rifles ki la leit ban pynlong ïa ka jingkhynra ha ka Sngi Saitjaiñ kaba la dep.
Ïa utei u ehrang jong ka KCP lem bad ïa ki tiar siat ba la ïoh ban kurup la leit ban aiti noh sha ki bor pulit ka Hiyanglam PS na ka bynta ban pyndep ïa ki jingtohkit kiba dang sah.
