Kohima, Rymphang:
U Chief Electoral Officer ka jylla Nagalang, u V Shashank Shekhar u la pyntip ba ha ka ilekshon sha ka Ïing Dorbar Thaw Aiñ jong ka jylla Nagaland kaba la pynlong ha ka 27 tarik mynta u bnai ki la la don palat 85% na palat 13 ngut ki nongthep ‘vote’ kiba la wan ban ïashim bynta ha katei ka sngi jied nongmihkhmat. U CEO u la ïathuh ruh ba ïa ka ilekhson ha ka jylla la lah ban pynlong ha ka lynti kaba ïaid beit ïaid ryntih khlem da don kino kino ki jingmih jong ki jingïakajia (lait noh ha ki 3 tylli ki konstitwensi).
Ïa ka ilekshon ha ka 27 tarik u Rymphang la pynlong ha ki 2291 tylli ki jaka thep ‘vote’ kiba don ha 59 tylli ki konstitwensi jong ka jylla. Ïa ka jingthep ‘vote’ ha Akuluto konstitwensi, Zunheboto district ym shym la pynlong namar ha katei ka thaiñ la dep ban jop da u kyrtong ka BJP – Kazheto Kinimi khlem da don kino kino ki kyrtong ki ban ïakhun pyrshah.
U CEO u la pyntip ba baroh ki nongthep ‘vote’ kiba la wan ban ïashim bynta ha katei ka sngi ki long baroh haduh 85.9%. U la ïathuh shuh shuh ba ha kaba ïanujor bad ka ilekshon kaba la pynlong ha u snem 2018, ka jingwan ïashim bynta jong ki nongthep ‘vote’ ka hiar da 1.99% ha kane ka ilekshon ba mynta. Ïa ka ‘result’ jong ka ilekshon la pynbeit ban pynbna ha ka 2 tarik mynta u bnai.
Ïa ka ilekshon sha ka Ïing Dorbar Thaw Aiñ jong ka jylla Nagaland la pynsdang ka por 7 baje mynstep. Ha ka jylla Nagaland ki don baroh palat 13 ngut ki nongthep ‘vote’ (6,47,523 ngut ki shynrang bad 6,49,876 ngut ki kynthei). Ki don baroh haduh 183 ngut ki kyrtong ki ba ïakhun ïa katei ka ilekshon.
Ha kane ka ilekshon kaba mynta, ka seng NDPP bad ka seng BJP ki la pynbteng ïa ka jingïalang paralok jong ki. Ka NDPP ka la pynïakhun ïa ki kyrtong na ki 40 tylli ki konstitwensi bad ka seng BJP pat ka la pynïakhun ïa ki kyrtong jong ka na ki 20 tylli ki thaiñ.
Ha ka ilekshon ba mynta ka seng NPF kaba la ïoh ïa ka nam jop na ki 26 tylli ki konstitwensi ha ka ilekshon jong u snem 2018 ka la pynïakhun tang ïa 21 ngut ki kyrtong ha kane ka kynti kaba mynta. Ha kane ka ilekshon ba mynta, ki la don ruh haduh 19 ngut ki kyrtong kiba ïakhun kum ki kyrtong shimet.
Ha ka sngi thep ‘vote’ ba la pynlong ha ka Lah Sngi U Blei mynta ka taiew, ka thaiñ Pughoboto ka dei ka thaiñ kaba la wan ban ïashim bynta da bun ngut eh ki nongthep ‘vote’ (92.11%), bud sa ka thaiñ Tseminyu ha kaba ki la don haduh 91.88% ki nonghtep ‘vote’ ba wan ïashim bynta bad ka thaiñ Mon (90.67%).
