Aizawl, Rymphang:
Ki bor shipai ka tnat Assam Rifles ha ryngkat ka jingïatrei lang bad ki bor sorkar ka tnat Customs ha ka Sngi U Blei ba la dep ki la ïoh ban kurup ïa u drok ‘heroin’ ba shongdor haduh T.13.3 klur. Ïa utei u drok la ïoh ban kurup na ka shnong Champhai – ka shnong khappud Myanmar-Mizoram.
Halor katei ka jingjia, na ka liang ki bor pahara ki la ïoh ruh ban kem ïa ki 2 ngut ki nong Myanmar kiba la donkti ha katei ka kam beaiñ. Ïa u drok ba la ïoh kurup ha katei ka sngi la song bad thep bha ha ki 200 tylli ki synduk sabon. Ïa kitei ki 2 ngut lem bad u drok ba la ïoh kurup la leit ban aiti noh sha ki bor sorkar ka tnat Customs, Champhai na ka bynta ban pyndep ïa ki kam tohkit kiba dang sah.
