Itanagar, Lber:
U PRO ka tnat shipai Indian Army – Lt. Col. Mahendra Rawat ha ka sngi Palei mynta ka taiew u la pyntip ba 2 ngut ki pilot jong ka tnat shipai Indian Army ki la duh ei ïa ka jingim hadien ka jinghap ka helicopter ha Arunachal Pradesh ha ka thaiñ kaba marjan bad ka ri China.
Ha ka jingpyllait kyrwoh jong u heh shipai u la pyntip ba ki 2 ngut ki pilot kiba la duh ei ïa ka jingim na katei ka jingjia kiba kynthup ïa u Lt. Col. VVB Reddy bad u Major Jayanth A. U heh shipai u la pyntip ruh ba katei ka la jia ha kawei ka thaiñ kaba marjan bad ka shnong Mandala, Bomdila, Arunachal Pradesh. U heh shipai u la ïathuh shuh shuh ba hadien ka jingïoh jingtip shaphang katei ka jingjia, ki la don haduh 5 tylli ki kynhun na ka tnat shipai Indian Army, SSB bad ITBP kiba la pynsdang ïa ka kam leit wad ïa kitei ki 2 ngut ki pilot.
U la ïathuh shuh shuh ba ïa ka shynrong jong ka helicopter kaba la hap la lap na ka shnong Banglajaap. U la ïathuh ruh ba halor katei ka jingjia la bthah ban pyntreikam da ka ‘Court of Inquiry’ na ka bynta ban tohkit halor katei ka jingjia.
Kat kum ki jingïoh lum khubor la ïathuh ba katei ka jingjia ha katei ka sngi ka la jia na ka daw jong ka jingsniew ha ka liang ka jinglong jingman jong ka suiñbneng. La ïoh jingtip ruh ba kor treikam sam kyrwoh jong katei ka helicopter (Cheetah) bad ka Air Traffic Control ki la duh noh ha ka por 9:15 mynstep.
