Pyntip u DGP ba la kem ïa 25 ngut kiba donkti ha ka jingjia lait tuh ki jingkylli eksam HSLC

Dibrugarh, Lber:

U DGP jong ka jylla Assam, u GP Singh ha kane ka taiew kaba mynta u la pyntip ba ki bor pulit jong ka jylla tad haduh kane ka kynti kaba mynta ki la ïoh ban kem ïa haduh 25 ngut ki briew, kynthup ki khynnah/samla pule kiba la donkti ha ka jingjia lait tuh jong ki jingkylli eksam HSLC ha ka sobjek General Science.

Haba ïakren bad ki lad pathai khubor, na ka liang u DGP u la pyntip ba napdeng ki 25 ngut, ki la don 12 ngut kiba la shah kem bad shah rah ban ngat hapoh ka jingtohkit jong ki bor pulit ka ban neh haduh 3 sngi lynter. Katba ïa ki 13 ngut kiwei pat kiba dang dei ki khynnah rit, la tohkit ïa ki kat kum ki kyndon jong ka Juvenile Justice Act.

U heh pulit u la ïathuh ruh ba ha ka miet jong ka 16 tarik mynta u bnai, ki bor pulit jong ka jylla ki la ïoh ruh ban kem sa ïa 3 ngut ki briew kiba la donkti ha katei ka jingjia lait tuh jong ki jingkylli. U la pyntip shuh shuh ba halor katei ka jingjia, ïa ka mokotduma la shimti ban tohkit bniah da ka tnat pulit CID.

U la pyntip ba na ka liang ka tnat pulit CID ki la phah khubor ruh sha ki bor pynïaid jong ka rynsan WhatsApp ban lum jingtip ba naei katei ka jingjia lait tuh ki jingkylli ka la saphriang nyngkong eh.

U la ïathuh shuh shuh ba ïa ki jingkhmih bniah lyngba ki kor ‘technical’ la pynsdang lyngba ki lad ‘telecom’ bapher bapher. U la pyntip shuh shuh ba ïa ki jingkylli eksam la die ha ka dor kaba hapdeng ka T.1000 – T.3000 bad la siew lyngba ka GPay, Paytm bad kiwei kiwei.

U heh pulit u la ïathuh shuh shuh ba na ka liang ki bor pulit ki la lap dien ruh ïa shibun ki sakhi na ki briew kiba la shah kem. U la pyntip ba ki dang don ruh bun ngut kiwei pat kiba dang don hapdeng ka jingphet rieh bad na ka liang ka tnat pulit ka la pynsdang ïa ki kam tohkit ban ïoh kem ïa ki.

Ïa ka eksam HSLC na ka bynta ka sobjek ‘general science’ ba la pynlong da ka Board of Secondary Education, Assam (SEBA), la pynsangeh noh hadien ba ki jingkylli eksam ki la lait tuh ha ka miet jong ka Sngi U Blei ba la dep.

Halor katei ka jingjia, na ka liang ka SEBA ka la pynbna ba ïa ka eksam yn sa pynlong noh ha ka 30 tarik mynta u bnai.